أم الــــبــــنــــــات

2011...2012....2013

2012-01-29T20:59:00.000+02:00

رحم الله شهداؤنا

مثل هذا اليوم العام الماضى ...كنا فى حالة قلق ورعب وتخبط ولم نعرف مصير الثوار...والثورة
ومازلنا
ولكن
مثل هذا اليوم من العام القادم نتمنى ان نكون توصلنا لمصير ثورتنا.

وإن شاء الله

سيرحل العسكر..ويقتلع نظام مبارك من جذوره...وتعود مصر لمن يحبها ولا يحب نفسه

يارب قر أعيوننا بنصر مصر

ليه تقتلنى ؟علشان بقول يسقط يسقط حكم العسكر؟

2011-12-25T22:18:00.002+02:00

تحديث

أم محمد مصطفى
شهيد الهندسه ونتخب التنس( البلطجى من وجة نظر العسكر)
من كتر الالم والوجع مش عارفه اكتب شئ عن اللى بيحصل
نفسى اكتب بس مش عارفه اكتب ولا كلمه...مش مصدقه اللى بيتعمل فى شبابنا...مش مصدقه قتلهم بدم بارد كده
مش مصدقه بيقولوا القاده لهم ايه علشان كده بينزلوا يقتلوا اخواتهم
سؤال لأى ضابط وأى جندى....الاوامر دى مقدسه؟ صح
طيب أوامر ربنا...عمرك ما ضيعت فرض؟ عمرك ما ارتكبت اثم. طول عمرك بتنفذ اوامر ربنا؟
ياراجل لما ممكن يضيع فرض ومتنفذش اوامر رب العباد....ينفع ولله المثل الاعلى انك تطبق اوامر ظالمه؟.
متعرفش تضرب فى الهوا..متعرفش تضرب فى الارض مضطر هيقتلوك يعنى....يا ناس تطبيق الاوامر مش قرآن
القائد بتاعك ظالم تبقى ظالم زيه؟ ايه الفرق بينك وبين المجند الأمى الل مش فاهم حاجه
والله مقدرش ااقول غير ان اللى نفذ الاوامر مش مضطر ..ولكن حابب يعمل كده لانك مش فى الميدان..واللى قدامك مش العدو.
قتلت اخوك..يتمت اولاده؟وجعلت نساء ارامل وامهات ثكلى...بتعرف تنام عادى مرتاح عادى
هتقول ايه لربنا؟. هتعتذر بإيه
مكنش عدوك ..كان اخوك فى الوطن ..ركبتوا يوم مواصلات سوا..وقفتوا يوم قدام محل تتفرجوا على الجذم...لعبتوا سوا وانتم صغيرين فى حديقةالحيوان...كنتم بتقولوا عليها جنينه الحوانننات صح؟ معقول بتنزل تضرب اخوك بالشكل العدونى ده فقط لانه قال يسقط يسقط حكم العسكر؟
طيب مهو كلنا بنقول يسقط يسقط حكم العسكر...هو مبارك مش كان عسكر؟
مهو كلنا عايزينها مدنيه...مختلف معايا...شايف انى غلطان...تقتلنى ياخويا تقتلنى ..ولا تفهمنى او تعاقبنى ..تسلب منى روحى وتحرمنى احقق أحلامى؟ ليه يا اخويا وانا نازل عايز بلدى أحسن
كل ده علشان كنت بقول يسقط يسقط حكم العسكر؟ مهو يسقط يسقط حكم العسكر
ليه يتمت ابنى ليه خليت مراتى الحامل ارمله...ليه حرقت قلب امى..ليه كسرت ابويا
علشان بس بقول يسقط يسقط حكم العسكر

طيب انا مت..وابنى اتيتم...وامى اتقهرت...وابويا انكسر ...وهيسقط يسقط حكم العسكر

أعمل إيه

2011-11-11T00:26:00.000+02:00

الصورة دى وصتنى بس الحمد لله مفهمتش حاجه
طبيعى إنى ان شاء الله هاروح الانتخابات وانتخب...بس إللى مش طبيعى إنى مش عارفه اعمل إيه
يعنى هل يوجود ارشادات ازاى نتصرف دون ان نبطل الصوت؟

يعنى ايه قوايم..يعنى ايه فردى..يعنى إيه مستقل

قبل كده كنت بروح اعمل فئات وعمال وخلصين

دلوقت مش عارفه اعمل ايه ..اه محدده هانتخب من حزب إيه..ولو مستقل هانتخب مين

بس السؤال انتخب من حزب ومستقلين ولا لازم من تقسيم واحد

بجد محتاسه ومش عارفه اعمل ايه

دلونى ودلوا غيرى بالله عليكم محتاسين

كل سنه وانتم طيبين

2011-11-04T00:15:00.000+02:00

كل سنه أنتم وكل أحبتكم بخير

بحبك يا بلادى

2011-10-04T04:52:00.001+02:00

يارب مصر يارب ..
.مش عارفين نعيش ولا نحس بالراحه
يااااااااه بحبها قوى
انا بحبك يا بلادى بحبك قوى
يارب انصرنا على من يكيد لنا..ونسألك ان ترزقنا حسن الخلق ...من علينا بحسن الخلق
منا علينا بالصلاح والتقوى
اصلح شأننا...يسر لنا الطرق لتحرير بيت المقدس
يارب افضح المنافقين يارب اظهر الحق....يارب مصر يارب
مش عارفه اكتب بس إللى متأكده منه إنى من ساعة الثورة وما يحدث لاولادى من الثوار وانا مش عارفه اعيش صح
يارب فك اسر المسجونين واشفى المصابيين...وانتقم من القتله واحضر لنا حقنا
وانصرنا واجعلها امان يارب

حملة شيل ورقه واحده من على الارض

2011-09-03T09:41:00.000+02:00

السلام عليكم ورحمة الله وبركاته
لو رصدنا التغيير الذى حدث للشعب المصرى سنجد اصحاب الاخلاق ازدادوا حلم واخلاق..ومن يعيش بلا اخلاق او بالقليل منها فقدها كلها
مال الناس هى الحريه انى اتطاول على الغير واسرق ما ليس لى
هل افسدنا مبارك لهذه الدرجه
هل دمر كل الاشياء الجميله التى يزخر بها الشعب المصرى
اظن انه إن شاء الله سنعود المصريين الذين كنت اسمع عنهم من حكايات أبى وأمى وعاصرت بعضهم بحكم سنى فلقد عشت فى زمن الاخلاق فيها اساسيه..وان كان التدين وقتها غير منتشر ولكن الشعب المصرى لم يكن يرضى بالفساد ولا التدنى الفج فى السلوكيات ولا الاخلاق
سيعود المصرى إن شاء الله ..ولكن متى لا أعلم
اريد ان اعلن عن حملة شيل ورقه واحده من على الارض لعلها تكون سبب فى نظاف ارضنا ولو بدأنا سيكون الفرصه كبييره
لان النظافه من الايمان فلنعلن عن حملة شيل ورقه واحده من على الارض ارجوا ان تساعدونى فى نشر الحمله

البلطجه والقصاص

2011-08-26T06:23:00.001+02:00

السلام عليكم ورحمة الله وبركاته

موضوع القصاص ده طبعا صعب قوى اننا نقوم به بنفسنا لانك مش هتقدر تقتص بنفس المقدار وهيبقى فى احتمال

تقتص اكثر من المفروض..او اقل من المفروض

لذا وجب ان يكون هناك من يقوم بهذه المهمه لانه اذا حصل أى خطأ هيكون مش مقصود ..وهيكون بدون دوافع

طيب نقول بقى لما تنتشر البلطجه...والشرطه مجروحه (كلام المشير) ..والشرطه العسكريه موجوده فى ميدان التحرير
والبلطجيه فى كل مكان ومعاهم آلى وسنج وبلطات.. يبىقى إيه؟ الحل إيه

فى دسوق لما غلب غلبهم اقاموا حد الحرابه بنفسهم...ولكن يظل سؤال مهم ينفع نقتص احنا واحنا مش مسئولين؟

اللينك ده عن البلطجى اللى اتقام عليه حد الحرابه..ومحدش كان عايز يغسله ولا يصلى عليه

محدش يقول المصريين قلبهم قاسى لا طبعا المصريين استوو الفترة اللى فاتت من بلطجه متنوعه وعلى كل شكل ولون

وكمان تقاعس امنى رهيب...مجروحين مقموصين....مش دى مشكلتنا ..قدام ربنا هيبقى المسئول المقصر خصيمنا..ونشوف لو هم بيقدروا علينا فى الدنيا ..هيعملوا إيه قدام ربنا الحق العدل العزيز الحكيم

لينك بلطجى دسوق

كل سنه وانتم طيبيين

2011-07-27T12:13:00.000+02:00

فى انتظار رمضان

اللهم بلغنا رمضان وارزقنا العمل الصالح المتقبل

كل سنه وانتم بخير وفى رضا من الله

اهزوجه بحبها واتفائل بيها ..وفيديو عملته للأحبه

2011-07-09T01:32:00.000+02:00

بحبها وبتفائل بيها وعارفه اننا هنوصل

وتحيه منى للشهداء عملت الفيديوده عرفان منى لهم بفضلهم هو طبعا مش رائع بس تجربه من اجل الاحبه

يونيو

2011-06-30T00:01:00.000+02:00

انجبت ابنتى الصغرى فى يونيو
انشأت مدونتى فى يونيو
توفى ولدى فى يونيو
والثوار انضربوا تانى بحقاره برضوا فى يونيو... وفى انتظار الفرج

شهر الاحداث فى حياتى رغم انى عمرى ما حبيتك بس مضطره احبك لانه يظهر هتفضل شهر فارق فى حياتى

الفقراء اولا

2011-06-17T22:15:00.002+02:00

التدوينه اليوم بقلم محمد ابو الغيط وده لينك الموضوع واللى مش هيظهر عنده الموضوع نزلته هنا
وانا لا املك سوى ان اقول له يا محمد القلم نزل على وشنا كلنا
يا محمد انت صح يابنى انت راجل ربى يجعل ابناؤنا جميعا مثلك يفهموا على الله

البوست ده على الفيس بوك....الفقراء اولا يا ولاد.............

by Mohamed Abo-elgheit on Friday, June 17, 2011 at 3:57pm

ما هو أول ما يتبادر إلى ذهنك عندما ترى هذه الصورة؟
المعتاد هو انهمار سيل من تعليقات السخرية من قبيل "مين كنج الرومانسية ده؟" "مين البرنس ملك السرس؟" .. والكثيرين جدا منا في الفيس قد رأو صورة (قصة حب شعبان وصباح) إياها بكل ما تستدعيه دائماً من افيهات، بل إن هناك الآن صفحات مخصصة للضحك على صور وأفعال هؤلاء العالم البيئة السرسجية مثل هذه الصفحة التي تجاوز عدد أعضائها الـ 23 ألف:http://www.facebook.com/sersg.gya?sk=info

المفاجأة اللطيفة المختلفة قليلاً هذه المرة أن صاحب هذه الصورة، كنج الرومانسية، البرنس ملك السرس هو الشهيد محمد عبدالحميد برصاص الشرطة يوم جمعة الغضب عند قسم الزاوية الحمراء!

كنت أذكر نفسي وأبقي شعلة الحقد المقدس مشتعلة في قلبي بالمرور على صور الشهداء عندما لفت نظري أن نسبة كبيرة فعلاً منهم هم من (العيال السرسجية)، الشباب أبناء المناطق الشعبية والعشوائية الفقيرة الذين الذين تكشفهم ملابسهم الرخيصة ومحاولاتهم للتأنق أو ادعاء الرومانسية بنظرات متأملة متشبهين بمن يرونهم في التلفزيون أو في شوارع المناطق الأرقى .. فلنشاهد معاً:

الشهيد احمد محمد سيد

19 سنة - وحيد أبويه على أربع بنات
هذا هو ما كتبه أحد معارفه تحت صورته: (امه حزينه ولكل ينتظر قضاء ربنا لانها تسارع الموت وهى امنيتها الوحيده بانها تشوف صورت ابنها فى التلفزيون واليوم كان فى تكريم للشهداء فى بنى سويف وذهب ابوه وهو سعيد لانهم هيكرمو ابنه قالوا ليه اسم ابنك مش معانا لاتتخيلو الصدمه والبكاء واخذا يصرخ دم ابنى راح هدر
ارجو الاهتمام لان اسره هذا الشاب فقيره جداجدا ولكن هى لاتريد غير ان يكرمو ابنهم والناس تقول بانه دافع علشانه بروحه هذا هو مطلبهم الوحيد ارجو ان تساعونى)

شهداء شارع أبو سليمان - الاسكندرية

الشهيد سيد فرج مسعود - العائل الوحيد لأسرته

الشهيد سامح عبدالفتاح محمد
21 سنه - كليه تجاره جامعه عين شمس
قتل بالرصاص أثناء محاولته انقاذ أحد المصابين أمام قسم الحدائق

الشهيد محمود حلمى

27 سنة - الأسكندرية - خطب قبل الثورة بشهر وكان من المقرر أن يتزوج في مايو - استشهد في ميدان المنشية برصاصة في الرأس

الزوج وزوجته استشهدا في مركز الواسطى بمحافظة بني سويف تاركين ثلاثة أيتام

الشهيد محمود على حجاب الشويحى
23 سنة - الأسكندرية - خريج معهد ايطالى لعلوم الحاسب الالى
استشهد يوم جمعة الغضب برصاصة في الرأس

الشهيد محمد نيازي - 16 سنة - الكوم الأحمر

الشهيد محمود خليل

23 سنة - 10عنوانه: حارة ابو زيد متفرع من شارع الصبان بالشرابية
اصيب بطلقتين يوم الجمعة 28 وتم العثور عليه بعد 3 اسابيع

الشهيد إمام كمال محمد عبد الله

أسرته فقيرة جداً ووالده متوفي وهو عائل أمه واخواته
العنوان: 2 شارع أحمد الصاوي -جزيرة دار السلام-القاهره

عبد الرحمن كمال فتحي
18 سنه - قتل برصاص الشرطة أمام قسم عين شمس

الشهيد خالد علي - دمياط

لماذا لا نرى أبداً صور أي واحد من هؤلاء وأمثالهم؟
لماذا لا يتم التركيز أبداً عند الحديث عن (شباب الثورة) أو (شهداء الثورة) إلا على أمثالنا فئة شباب الطبقة المتوسطة/البرجوازية الصغيرة المتعلم الأنيق الذين خرج منهم شباب الائتلافات و6 أبريل؟
لماذا غاب عن تحقيق المصري اليوم التاريخي إياه الذي تحولت صور الشهداء الذين ظهروا فيه إلى أيقونات بصرية أي صورة لأحد هؤلاء؟ هل لأنهم (بيئة) أو (سرسجية) فلا يصح أن يكونوا من (الورد اللي فتح في جناين مصر)؟
على كل حال هم لم يهتموا طوال حياتهم بالورد، لأنهم اهتموا بالأهم: الخبز.

*****

إنا نُحِبُ الوَرد
لكنَّا نُحِبُ الخُبزَ أكثر
ونحبُ عِطْرَ الوَرد
لكن السَنَابلَ منهُ أطهَر

محمود درويش

*****

يستفزني دائماً ذلك الجدال السخيف الذي يدور من حين لآخر حول دور كل قوة سياسية أو تنظيم شبابي في الثورة، ولا بد من الشجار حول أهمية دور 6 أبريل وحول اليوم الذي بدأ الاخوان المشاركة فيه وهل حقاً تأخروا ثم ركبوا موجة الثورة، وما مدى دورهم يوم موقعة الجمل وهل لو غابوا لسقط الميدان وانتهت الثورة ...الخ الخ، لكن لا يتحدث أحد تقريباً عن الدور الأهم وهو دور (العيال السرسجية) في حماية الثورة والتصدي لقوات الشرطة واحراق سياراتهم وأقسامهم خاصة يوم 28،مع أنه فعلاً ربما لولا هذا لما سقطت الداخلية في بضع ساعات!

للأسف لم أحضر جمعة الغضب في القاهرة كما كنت انتوي لاعتقالي وقتها، لكن ابن خالتي حكى لي شهادته عن ما حدث يومها، وبالتأكيد ما شاهده هو نموذج لما تكرر في كل مكان في مصر .. كان قد نزل للتظاهر السلمي المعتاد مع مجموعة محدودة من أصدقاءه، صلوا الجمعة في مسجد السيدة عائشة وبمجرد بدايتهم الهتاف انهالت عليهم قوات الأمن بالضرب وقنابل الغاز والرصاص و.... "وأنا وأصحابي جرينا ندور على حتة نستخبى فيها، والرصاص وقنابل الغاز دخلو بلكونات البيوت فلقينا الناس أهل المنطقة عمالين ييجو وهما بيهتفو (***** أمك .. يا مبارك) (حكومة وسخة .. يا ولاد الوسخة) و ( ولاد الـ ****** .. باطل)، وكل واحد نازل بسنجة ولا بمطوة واللي يطول عسكري أو ظابط يغزه، والستات من البيوت كل واحدة منزلة سبت، كنت فاكرهم بينزلو خل طلعو بينزلو قزايز غاز والعيال تعملها مولتوف وترمي على العربيات والعساكر، مفيش ساعتين تلاتة وكان كل العربيات ولعت والعساكر والظباط هربو والقسم اتحرق!"

صديق آخر من الجيزة حكى لي قصة مشابهة "...قلت أنا لازم أنزل النهاردة أضرَب وأضرِب، لقيت عيال المنطقة نازلين بعد الصلاه فنزلت معاهم طلعو عيال سيس أول ما العساكر يضربوهم وياخدو منهم كام واحد ويضربو قنابل الغاز يرجعو يجرو، شوية ولقيت عيال الطالبية - منطقة شعبية قريبة - جايين قلت بس هما دول .. الواد منهم يضرب الترامادول - أقراص مخدرة - وينط فوق المدرعة يجيب العسكري اللي فيها وينزل بيه! .. شوية وعرفو يسحبو العساكر على المنطقة عندهم وفي ثواني كانو حلقو عليهم من قدام وورا والعيال من فوق السطوح ترمي طوب ومولتوف، مفيش ساعة وكانت الداخلية كلها هربت والظباط قلعو هدومهم قبل ما يجرو ملط!"

ونفس المحتوى تقريباً حكاه د.محمد سليم العوا أمامي عن شباب شبرا الذين أتو بالعصي والمطاوي وكسر الرخام ليدافعوا عن مرافقيه من شباب مدينة نصر عند مدخل التحرير من ناحية فندق هيلتون رمسيس .. وهناك من حكى لي أيضاً عن أبناء شبرا والدويقة الذين شاركوا في الدفاع عن الميدان يوم موقعة الجمل.

هؤلاء لم يخرجوا ليطالبوا بالدستور - سواء كان أولاً أم آخراً - ولا بالانتخابات، لم يخرجوا لتكون مصر ليبرالية أو مدنية أو إسلامية أو مهلبية! .. خرجوا فقط للأسباب التي تلمس واقعهم .. أسعار الطعام والملابس والمساكن التي ترتفع بجنون، أمين الشرطة الذي يوقف ميكروباص أخيه ليسرق منه خمسين جنيهاً، الضابط الذي أخذه تحري وعذبه لأيام بلا ذنب، أخته التي لا يملك نقوداً (ليجهزها)، عمه الذي تم تسريحه معاش مبكر بعد خصخصة المصنع، ابن عمه الذي خسر كل شيء في أراضي شباب الخريجين التي مات فيها الزرع عطشاً بعد تفضيل أراضي الكبار، خالته التي ماتت بالسرطان ولم يجدوا لها سريراً في المستشفى الحكومي ...الخ الخ الخ
في مشهد يلخص كل شيء في هذا الفيديو الذي يصور حرق قسم السيدة زينب - عند 5:50 -
http://www.youtube.com/watch?v=LxgI1Xnl0SQ
يطلب مصور الفيديو - الذي يبدو من صوته وأسلوب كلامه أنه من الطبقة المتوسطة المتعلمة - من أحد الشباب الذي يبدو أنه ابن المنطقة الشعبية أن "ياخد باله من ضرب النار" فكان رده التلقائي "عااااادي .. خلاص معادتش فارقة أموت ولا ماموتش" .. لم يقل له "كله يهون عشان مصر" أو "أموت شهيد فداء الاسلام" .. لا تنظير أو (كلام كبير) من أي نوع، ليس الوطن أو الدين أو حتى الكرامة .. فقط الشعور العدمي بأن حياته بهذا الوضع البائس لا تختلف كثيراً عن موته ..
هل كان يتصور أنه سيأتي يوم يقول فيه البعض أن عدم وضع الدستور أولاً هو خيانة لدماء الشهداء، ليرد عليهم فريق (الانتخابات أولاً) بأننا نحن أكثر من قدم الدماء والتضحيات دفاعاً عن الثورة؟!

*****

الحق أقول لكم:
لا حق لحى إن ضاعت
فى الأرض حقوق الأموات
لاحق لميت إن يهتك
عرض الكلمات !
وإذا كان عذاب الموتى
أصبح سلعة
أو أحجبه أو أيقونه
أو إعلانا أو نيشانا
فعلى العصر اللعنة،
والطوفان قريب !

الأبطال
بمعنى الكلمة
ماتوا لم ينتظروا كلمه
مادار بخلد الواحد منهم
- حين استشهد -
أن الإستشهاد بطوله
أو حتى أن يعطى شيئاً
للجيل القادم من بعده
فهو شهيد لا متفلسف
ماذا يتمنى أن يأخذ
من أعطى آخر ما يملك
فى سورة غضب أو حب ؟!

نجيب سرور

*****

بالنسبة لهؤلاء - الممثلين لـ 40 % من المصريين تحت خط الفقر، منهم 12 مليوناً يعيشون في العشوائيات و 1,5 مليون يعيشون في المقابر - كل الصراع حول الدستور والانتخابات ونظام حكم البلد عبارة عن كلام جرايد لا يمثل أي شيء إلا بقدر تأثيره المباشر جداً على فرص عملهم ورواتبهم وظروف معيشتهم، وهو ما لا يبدو أن أي من الفرق المتصارعة يهتم به فعلياً، والنتيجة أن قطاعاً كبيراً جداً من الناس يشتمون الآن الثورة والثوار والسياسيين جميعاً بعد ارتفاع أسعار كل السلع تقريباً هذه الأيام - وهو ما شكل خيبة أمل كبرى عند عامةالشعب الذي ظن أن الأسعار إن لم تنخفض فستثبت - وبعد المزيد من انسداد سبل الرزق، على حد تعبير سائق الميكروباص الذي نقلت عنه في تدوينتي السابقة (*) "والله فيه ناس تعبانة وأغلب من الغلب مش لاقيين ياكلو والعشرة جنيه تفرق معاهم بس انتو مش عارفين .. أنا راجل أعرف أجيب القرش لكن الناس الكبيرة اللي عدا الستين سبعين سنة ومش بيشتغل وعايز يجيب دوا يعمل ايه؟ .. وفيه ناس كانو عايشين أرزقيه على باب الله دلوقتي بعد الثورة - أستغفر الله العظيم - حتى باب الله معادوش لاقيينه!"

لم نسمع صوتاً لأحد من (النخبة) معترضاً على ارتفاع الأسعار .. من قلبوا الدنيا عند إشاعة تعرض ناشطة للضرب لم نسمع لهم صوتاً للتضامن مع معتصمي مخيمات مدينة السلام الذين بقوا خمسة أيام في الشارع وتم دهس احداهم وغرق أحدهم في النيل، بل ربما أدانهم البعض فهم أصحاب (مطالب فئوية) .. كان عليهم أن يخرسوا وينتظروا في الشارع أو عشش الصفيح إلى أن ننهي خلافتنا الأهم من تفاهاتهم!

في التسعينات كان أردوغان يحضر مؤتمراً لممثلي المنظمات الإسلامية، وبدلاً من أن يقول أنه سيعمل على (تطبيق الشريعة) أو (نشر الروح الاسلامية في النسيج المجتمعي) قال لهم أنه سيعمل على حل مشكلة الصرف الصحي في اسطانبول، ليضج الحاضرون بالضحك!
لكن هذا فقط ما أوصله وأوصل تركيا بالتبعية إلى ما هم عليه الآن، لا ينتخب الأتراك حزبه لأنه إسلامي أو لأنه سيضع دستوراً أكثر ديموقراطية، بل فقط لأنه من أثبت قدرته على حل مشاكلهم اليومية الواقعية .. ليس لدينا أردوغان مصري حتى الآن للأسف ... لدينا فقط العواجيز النخبويون المملون من كل الأطراف الذين مازالوا غارقين في تنظيرات (إسلامية/علمانية) و (الدستور أولاً/الانتخابات أولاً)، ولهم جميعاً أقول:
الفقراء أولاً يا ولاد الكلب!

______________________
(*) لمن يريد الاطلاع على باقي كلام سائق الميكروباصhttp://gedarea.blogspot.com/2011/06/blog-post_4438.html

سبحان الله

2011-06-03T14:43:00.000+02:00

السلام عليكم ورحمة الله وبركاته

اليوم اول ايام رجب ..رجب الخير

عباد الله

ان الله لا يفضح احد إلا إذا اصر هذا الشخص على المعصيه والاستمرار فيها

وإيذاء الناس ليس بالهين..والاصرار عليه عقابه ليس بالهين

سبحانك يارب العالمين

تكشف كل يوم الفاسدين وتنجينا منهم

وترزقنا الرضا برضاك

اللهم ارزقنا رضاك والجنه وابعد عنا شر خلقك المتشدقين بكلامك وهم اول الكافرين به

يارب نجى ذريتنا من البشر السوء وارزقهم صحبة عبادك الصالحين

الى كل فاسد وكل عاصى وكل مصر على معصية الله

نحن اليوم أول ايام رجب توبوا إلى الله يرحمكم الله

اللهم بارك لنا فى رجب وشعبان وارزقنا بلوغ رمضان وانت راضى عنا

مدنيه ..مفيهاش بدله عسكريه

2011-05-23T00:15:00.000+02:00

مش هارغى كتيير ولا هاحكى غيرى اشطر بكتيير منى فى الحكايه

دى

انا منزلتش التحرير بس كنت متابعه ومن المؤيدين..ومع الثورة زى معظم المصريين

وعندى قياسات عقليه بستخدمها علشان اعرف الصح من اللى الخطأ

انا شايفه اننا بعتنا مبارك يرتاح شويه فى شارم على ما يوضبوا له الدنيا ويظبطوها وبعدين يرجع يكبس على نفسنا

نفسى بلدنا تبقى مدنيه مفيهاش محافظ لواء ولا وزير ظابط ولا مدير فريق

نفسى يبقى كلهم خريجى جامعات ومعاهد ..محدش منهم اتخرج من كليه عسكريه

كنت زمان مش بحب اشوف ظابط شرطه ..بعد اللى سمعته بقيت اخاف اعدى من جانب ظابط جيش

ارجعوا علشان لا انتم تقدروا على العيشه المدنيه

ولا إحنا نعرف نتعامل مع الحياة العسكريه

واحنا معدناش احنا ..وانتم لايمكن هتكونوا انتم

كل المصريين اتغيروا

مدنيه مفيهاش بدله عسكريه

مصر هتبقى احلى لو كلنا بجد اتقينا ربنا فيها

جزاء الظالمين.... تم بفضل الله....ثواب الطيبين؟ هم فين

2011-05-14T12:13:00.001+02:00

السلام عليكم ورحمة الله وبركاته

بعد وجع دماغ كبيير وصداع رهيب ومهاتيه اكتشفت

ان اللى حصل فى مصر المقصود به مبارك واسرته والحاشيه

بمعنى ..عندما تطاول هؤلاء وظنوا انهم قادرون عليها اتاهم امر الله

مبارك ومن حوله تخيلوا انهم (انا ربكم الأعلى)

لذا تم اهانتهم وزلزلة عرشهم

اما المصريين...... لم يصلحوا ما بينهم وبين الله حتى يكافئهم

تساؤلات

2011-05-06T03:05:00.001+02:00

السلام عليكم ورحمة الله وبركاته

هل الثورة مستمرة ولا بتاخد تعسيله وجايه؟

ليه كل واحد قال كلام حقير فى حق الثورة مستمر فى مكانه؟ وبيضحك علينا

الامثله كتيير

مش عارفه ليه حاسه الإعلام بتاعنا لسه موجه ..وكل يومين يطلعوا بشئ يصرف

انتباهنا عن ثورتنا واهدافها ودم الشهداء

منى الشاذلى تجيب شيخ سلفى كلامه مش مترتب وقبل كده اهدر دم البراعى

ونسمع تعليقات سخيف

هو ليه الازهرسايب الناس تعك وهو بيتفرج؟

طيب الست سوزان مبارك فين ليه مش بتتحاكم؟ وكل الفاسدين ليه مش بيتحاكموا؟

المسلسل السخيف يتاع 15 هينتهى إمتى؟

الشرطة مش هتنزل؟

الفلول هتنتهى إمتى؟

الاحكام ليه ابتدائيه مش نهائيه...والبيه العادلى مازال بيتحاكم بغسيل اموال

والقتلى دول مين هيجيب حقهم؟

الشهداء اخد اهلهم تعويضات ولا لاء؟ والمصابين اتعالجوا كلهم؟

كل يوم ليه يقول صحة مبارك..مبارك قال..هو مش خلصنا من مبارك؟

احمد بهجت وساويرس وفريد خميس وكل رجال الاعمال اللى اخدوا تسهيلات فين

فين يا عصام ياشرف وزراء شرفاء ..عندك كام وزير عايزين الرمى برة الوزارة..ياترى وزرتك هتنظف إمتى

اخر كلمه ومش تساؤل المصريين مش بيرجعوا لوار دا اكيد

تويتر حبيبى علمنى قلة الأدب

2011-04-29T23:16:00.005+02:00

اتخنقت من الناس على الفيس بوك
مش عايز تقعد فى مكان حد يناكفك مناكفه منتظمه ويطاردك؟
هاقولك على مكان هتجيب منه احدث الاخبار

واحدث الشتيمه

هتسمع الفاظ تشيب الشعر وبعد يومين من كتر ما هتسمعها هتحسن كأنك بتسمع شعرلجويده
(خاصية التعود)

عليك بتويتر يا محترم

بصراحه اتخنقت من الناس او بعضهم على تويتر مش عارفه ايه شبه الاجماع على سب أى شئ إسلامى كأنهم مش مسلمين

يعنى مشفتش حد من النصارى بيشتم

والغريب محدش من دول بيعلق على أى تصرف بيحصل من النصارى

فى إيه

ليه الاسلام مستباح

من الآخر ايها المحبين لسب الاسلام لن تكون لكم مصر

لان مصر شعب مسلم متدين ..وانتم قله قليله

ويللى بتتجرأ على أى شئ إسلامى روحوا اتجرأوا على اى شئ من الاسماء الجديده (محدش يسألنى ايه هى)

حاجه تقرف بجد ...وشئ مقزز

كام يوم يستلموا الإخوان ...وتريقه وهشتاج ونقعد نسمع حقاره ودناءه من الالفاظ

يومين ويستلموا السلفيين ... زى الاخوان وأكتر

شويه الصوفيين

بعدها ...الشيخ الفلانى..والشيخ العلانى

غير الاسلوب الهجومى لو حاجه مش عاجباهم
على أى حد بقى

اللى عايز يبقى عنده فلوورز كتيير...اديها شتيمه فى الاسلام ودافع عن العلمانيه المحضه العلمانيه الملحده

او دافع عن الليبراليه (اللى تهاجم الاسلام) اما ليبرالى يتقبل نقد أى فكر او فكره نفسه او حتى ديانته لو مسيحى

انسى
انا اصلا بحتر فكرة اننا نحترم الآخرين (ليبراليه اهو)
لكن اول ما مسلم يختلف ياخد على دماغه تريقه وكلام فعلا" وقح ومقزز

بصراحه تويتر أكتر مكان تسمع فيه شتائم يالهوتى بجد مش يا للهول لالالالالالالا

على رأى يوسف وهبى رطنت بالبلدى بنت سلطح بابا

اشتم بكل الالفاظ اللى تتخيلها لدرجة مرة بسال زوجى على كلمه...سمعتها كتيير هناك اتخض وقالى :إيه الكلام السافل ده سمعتيه فين؟ ..قلت له من تويتر

كمان بعض البنات بتشتم بالفاظ غير مقبوله ابدا

ليه كده ..فين الأدب والاخلاق

فى ايه هو الشاب الرائع الكول لازم يكون اع ابيح

اخص على كده
رغم كده تويتر حبيبى ومش هيعلمنى قلة الادب
اصلى واخده مضاده
قرآنى الحمد لله بيحمينى

تهيس

2011-04-22T04:30:00.000+02:00

كان كل يوم بيندفن فى قبر الظلم أمـــل

و كان من جنبه...يطل حلــم ينادى بوجل

ويدور على صاحبه.. يلاقيه ..يجيبه ..يشده ..ويقوله

تعالى انا جيت .. ومن العدم ابتديت

وعلشانك ..انت بالتحديد مريت .. وعديت

وعلى كل صعب ومستحيل ..شديت

اوعاك يا صاحبى تقولى ياريتك ماجيت ولا برحالك حطيت

دانا علشان عرفت انك تستحق

غامرت وهربت وعرفت اعبر الصعب وجيت

ولحد عندك بكل تقلى حطيت

اوعى تخذلنى ولا تخلينى اندم

انى من دون العالم كله اخترتك

يامصرى يللى معروف عنك شهامتك

مينفعش تطردنى علشان مضيعش لك..وقتك

انا لومشيت دلوقتى يبقى عمرك ماهتلاقى ابدا حقك

تاج الثورة

2011-04-19T01:26:00.002+02:00

*** هل توقعت ثورة 25 يناير؟
لا لا لا

*** وهل كنت من ثوار ميدان ( التحرير _ الكنبة _ الكمبيوتر _ حدد الميدان الآخر الخاص بك )

الكمبيوتر ,الفضائيات من خلال الكنبه

*** مالم تنجح الثورة في تحقيقه هو ....................( اختار شيئا واحدا)

القضاء الكامل على النظام الفاسد

*** أكثر شىء فرحك في هذه الثورة هو .........................( اختار شيئا واحدا )

ان اخلاق المصريه الحقيقيه ظهرت

*** الشخصية التي أعجبتك خلال الثورة .......................

كل الناس اللى مكنتش اتخيل انهم وطنيين
وبهرونى باصرارهم على ان تنجح الثورة

*** الشخصية التي احتقرتها بسبب الثورة

كل من دافع عن مبارك

*** أطرف ما سمعته خلال الثورة ؟( تعليق _ نكتة _ حدث _ أخرى )

ان مبارك رمز لا يجب إهانته

*** القناة التي تابعت من خلالها أحداث الثورة هي ؟.

كل الفضائيات ماعد اى قناة تحمل الجنسيه المصريه

*** الجريدة التي كنت تقرأها لتتابع الثورة هي ؟

مكنتش بقرأ جرايد

*** الكاتب المفضل خلال الثورة هو؟

مكنتش بقرأ حاجه لحد كنت هتجنن من الاحداث

*** المذيع (المذيعة) المفضل خلال الثورة هو ؟

مذيعين ومذيعات الفضائيات الغير مصريه

*** كلمة تقولها لشهداء وجرحى 25 يناير ؟

دمكم خسارة فى معظمنا

*** متقولش إيه إدتنا مصر وقول حندي إيه لمصر

عندك حاجة تديها لمصر ؟

الدعاء ان شعبها يرجع أصيل زى زمان وينفض عنهم غبار السنوات

*** من سترشح لرئاسة الجمهورية ؟ ولماذا ؟

أى حد يخاف ربنا ويتقيه فينا

علشان مش هيقدر يإذى حد

*** لو أصبحت رئيسا لمصر ما هي أول ثلاث قرارات لك ؟

اخلى رسوم المرور من قناة السويس بالجنيه المصرى
انقل كل الادارات المركزيه للواحات
اشوف حل للعشوائيات

*** لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال ؟

لو اعطونى نصيبى ...اكيد هاستخدم جزء لعلاج الولاد اللى عيونهم انصابت من الثوار

والباقى اكيد هاعرف اصرفه

الستات متتوصاش

امرر التاج لكل اللى مجاوبهوش عليه

عودة

2011-04-02T02:00:00.002+02:00

ياااااااااه فترة طويله قوى غيبت عن التدوين وانشغلت بالفيس بوك والثورة والكلام والناس شمال ويمين والخناقات من وراء الشاشات

اكتر من شهرين كانوابيتحسبوا علىّ تقصير وضياع فى حق الله

الحمد لله الذى رد إلى ما كنت افتقده

دعواتكم...افتقدت القراءة لكم وانشغلت بقراءة الخلافات والمهاترات

كنت طرف ولكن ربى انقذنى ...خرجت الحمد لله

أن تعوداليك نفسك بعد فترة طويله كانت مختبئه منك شئ لا يقدر بكنوز الدنيا …اهلا بمن كنت ابحث عنها...وفقدانها افقدنى التوازن وعودتها ردت إلى جميع حواسى وكأنى كنت فى تخدير شديد

والله نستحق... وأكثر

2011-03-23T14:11:00.000+02:00

السلام عليكم ورحمة الله وبركاته

اذا استمرينا بنفس اخلاقنا ونفس اسلوبنا يبقى منلومش غير نفسنا

كما تكونوا يولى عليكم

نحن نستحق ما نحن فيه

اما من لا يستحق ما نحن فيه وما نعيشه .. وما نعانيه ونرزح تحته

شهداء عند ربهم يرزقون

الله اصطفى من بيننا الاخيار ..وتركنا لاتننا مازلنا لا نستحق الحريه والعيش بكرامه

لاننا تفرقنا وتنازعنا ففشلت ريحنا

يارب طلب وحيد ارزقنا همه مع فرصه اخرى قد يكون بيننا من يستحقها

رساله إلى حزب الكنبه.......بقلم عزت أمين

2011-02-23T15:51:00.003+02:00

رسالة الى حزب الكنبة العظيم

by: Ezzat Amin

تحديث المقاله كلها عاجبتنى ما عدا جزء العلمانيه
ومكنتش مركزه قوى وانا بحطها اتنين لهم الفضل اخ لى اسمه ابشر
و واحد من الناس
علشان كده انا ضد الكلام بتاع العلمانيه بس مش هاحذفه لان المقاله لا تخصنى ولكن سأظلله بالابيض

حزب الكنبة هو حزب يضم فى عضويته كل من كان يشاهد ثورة شعب مصر فى 25 يناير من خلال كنبة بيته ولم يقم الا لعمل كوب من الشاى

وحزب الكنبة يضم مؤيدين ومعارضين للثورة ويسألون اسئلة وساحاول ان ارد عليهم بدون الدخول فى فذلكة سياسية

السؤال الأول: مين شباب 25 يناير؟

الاجابة: مافيش وصف محدد للشاب ال 25 يناير...لو قصدكم على ممثلين الثورة..فامافيش برضه ممثل معين..ودة لان الثورة دى جديدة علينا ,,لأننا متعودين ان الثورة شخص...هوجة عرابى..سعد زغلول..جمال عبد الناصر ومحمد نجيب..اما الائتلافات ومجلس الثورة فهى مكونة من نشطاء وحركات سياسية لضمان نتائج الثورة مثل الجمعية الوطنية للتغيير وشباب 6 ابريل والاخوان المسلمين وحركات تانية سياسية وحقوقية مثل كفاية

السؤال الثانى: امال مين وائل غنيم؟

وائل غنيم شاب مصرى يعمل بشركة جوجل الامريكية ومن مؤسسى جروب كلنا خالد سعيد...وهذا الجروب قام بمشاركة حركات سياسية كبيرة فى الاعداد للثورة وهذا الجروب والمشتركين فيه ساهموا فى قلب قضية خالد سعيد لقضية رأى عام واعادة تشريح جثته والعمل على دفع الشباب للخروج الى الشارع فى وقفات احتجاجية صامتة على كورنيش الاسكندرية وكورنيش النيل بمصر وهذا الجروب هو من اختار يوم 25 يناير وجمعة الغضب

السؤال الثالث: بس وائل غنيم طلع ماسونى

حتى لو طلع ابو لهب انت فارقة معاك فى ايه؟ ركز معايا وائل ماقالش انه بطل ولا عايز يبقى جيفارا..وتشويهه دى خطة الحزب الواطى من زمان..يخلى الثورة شخص وبعدين يشوهه..زى ما حصل لنعمان جمعة رئيس حزب الوفد السابق وايمن نور من حزب الغد والبرادعى..نفس الاسلوب البيئة بتاع الحزب الواطى..ومش عارف انتوا يا حزب الكنبة ليه بتقعوا فى نفس الخطأ..وبعدين انت عارف يعنى ايه ماسونى اصلا؟

السؤال الرابع: بس هو فعلا مزقوق من الامريكان علشان طنط جارتنا ابنها ملازم فى المرور عارف كل حاجة

طب وائل غنيم جاسوس..تحب نرجع مبارك؟

السؤال الخامس: طب هو مبارك مش راح شرم..هم عايزين ايه تانى؟

اولا مين هم؟ لو انت مش شايف انك جزء منهم..خليك سلبى وماتعترضش عليهم..اشمعنى يعنى كنت سلبى ومبارك بيورث ابنه مصر ومسلمها لاحمد عز؟..اعتبرهم زى مبارك يا اخى..ولا علشان هم ماعاندهمش امن الدولة تعترض عليهم ومبارك كنت عامل نفسك مش واخد بالك..طب ايه رأيك بقى ..دول اللى شالوا مبارك..تانى حاجة حسنين هيكل التعلب السياسى بنفسه طلع على القناة المصرية اللى تحت سيطرة الجيش وقال مبارك يحكم مصر من شرم..ولا انت بتفهم اكتر من حسنين هيكل وشباب الثورة والجيش اللى سامح بكل دة يتقال..اعمل لك كوباية شاى تانية وركز

السؤال السادس: انا زهقت ما تخليهم يبطلوا يروحو الميدان..مش طالبة زحمة

اكيد لما مبارك وامن الدولة والداخلية ما يقدروش عليهم هم مش هسمعوا كلامك ولا كلامى ولا كلام اى حد الا ما تتحقق مطالبهم...وميدان التحرير اكتسب شهرة عالمية وكل الدنيا مبهورة بينا...انت كدة كأنك بتطلب من الصين تشيل السور العظيم بتاعها علشان سادد عليهم منظر البحر..وبعدين زهقت من ايه؟ دى ثورة مش كرنفال الكربة ولملم

السؤال السابع: بس عيب اللى عملوه فى مبارك ..دة كبيرنا

ممكن اعتبرة كبيرنا لو كنا عصابة...يعنى مش محتاج اوريلك كم الفساد والنهب ويكفى ان محمد حسنين هيكل قال على القناة المصرية اللى هى تبع الجيش ان موضوع الضربة الجوية دة كلام مضحك وانه ازاح ابطال اكتوبر كما تزيح المرأة الغيورة ضراتها..وانه كان بياخد 800 900 مليون جنيه من مخصصات قناة السويس لنفسه...تانى حاجة تقدمه فى السن لن تعفيه من المسائلة ولا المحاكمة...ومش من المنطقى رجل استهزأ بشعبه وقال على المعارضة خليهم يتسلوا ونطلع نلطم ونقول له خد الدوا يا ريس ولا لما يلاقى حزبه لاهف كل مقاعد البرلمان ويشكر عز على الهواء على نزاهة الانتخابات ..واقول معلش اصل سنه كبير

السؤال الثامن: بس مش هو اللى بيعمل كدة..دة ابنه واللى حواليه

وهو صغير مش واخد باله ان الوزرا دخلوا الحزب ورشحوا نفسهم فى مجلس الشعب وبيسرقوا؟..اذا كنت انا عارف وانت عارف..هو مش هيعرف؟

السؤال التاسع: طب ايه موضوع حكومة تكنوقراط دى؟

تكنوقراط يعنى ناس محترمة ليها خبرة فى مجالها ولا تنتمى لحزب ومحبوبة بين الناس..كأنك مسكت احمد زويل التعليم

السؤال العاشر: الاخوان الاخوان..يا خرابى..القرضاوى جيه ..احييه احييه

انشف ناشف كدة وماتقعدتش تلطم زى اسرائيل وبطاقتك فى ايدك انزل وانتخب

السؤال الحادى عشر: طب انتخب مين؟

الثورة قامت علشان ماحدش يبقى وصى على حد ويقول لك انتخب مين..اتعب شوية واقرا البرامج الانتخابية وانت على الكنبة

السؤال الثانى عشر: يعنى عاجبك اللى حصل فى مصر دة؟

لو قصدك على التلاتين سنة بتوع حكم مبارك اكيد مش عاجبنى..لو قصدك على الحرق وتهريب المساجين برضه مش المتظاهرين..مين اللى طلعهم..انا مش النيابة ولو ردك ان المباحث هى اللى طلعتهم يبقى انت رديت على نفسك خلاص وعرفت مين اللى كان خارب البلد

السؤال الثالث عشر: طب والمطالب الفئوية

واضح انك ناسى الاعتصامات اللى كانت قدام مجلس الشعب..المطالب دى من زمان وهى شغالة وماحدش عبرهم..ابتدوا من قبل الثورة وانضموا للثورة ولسة مكملين

السؤال الرابع عشر: بس دى هتخرب البلد

اللى خرب البلد جهاز امن الدولة اللى كان معين ناس فى نقابات العمال وكل النقابات وماكانتش بتجيب للناس حقوقها

السؤال الخامس عشر: ايه الثورة المضادة؟

الثورة المضادة انك تلاقى حسام البدراوى عضو الوطنى السابق بيعمل حزب اسمه 25 يناير..وانك تلاقى اشاعات عمالة تطلع من رجالة صفوت الشريف لافقادك الثقة فى الثورة والشباب اللى عملوها فتختار واحد كنت تعرفه من النظام القديم..الثورة المضادة انك تلاقى رجالة امن الدولة بتولع بين الناس وتبعت الرجالة والبلطجية تسرق وتقتل وتقومك على الداخلية فى نفس علشان الثورة ما تنجحش وتتمنى عودة حد من النظام القديم على اساس انه فاهم فى البلد

السؤال السادس عشر: يعنى بعد الثورة كيس المكرونة هيبقى بكام؟

يا ريت نبص لابعد من كيس المكرونة والفرخة..25 يناير المطالب كانت عيش..حرية..عدالة اجتماعية..لو حاسس ان الكلام دة ميأكلش عيش..هاقولهالك بالطريقة اللى انت تفهمها..لما مديرك ما يدفعش رشوة علشان المسئول الفاسد هرب بعد الثورة او اتقبض عليه..الفلوس الزيادة اللى مع مديرك دة مفروض يشبرئك بيها او يكبر البيزنس فتكبر انت معاه او يرخص الاسعار علشان

المنافسة فكيس المكرونة بتاعك هيرخص

السؤال السابع عشر: يا عم امريكا واسرائيل وايران هتحتلنا بسبب الثورة

اسرائيل بعد اول يوم من الثورة وهى عاملة زى النسوان وعمالة تلطم..على الغاز ومعاهدة السلام وبان قد ايه هو ضعفاء..وبعد الضغط الشعبى الغاز انقطع عنهم.زولما فتحوا بقهم زيادة الجيش سمح بعبور سفينيتين ايرانيتين فاتلموا خالص وابتدوا يدوروا على غاز عندهم..وبالراحة كدة مع بعضينا..بن اليعازر مدير الموساد السابق قال على مبارك كنز استراتيجى لاسرائيل..ليه؟علشان مبارك كان بيغذى فينا فكرة الرعب من اسرائيل بقالوا تلاتين سنة..دة غير انه كان بيديهم 40 % من الغاز الطبيعى بتاعهم. بتلت الاسعار العالمية..وبعد ما قفلنا الحنفية..عملوا ايه؟ ولا حاجة..وامريكا تحتلنا ليه..طب والكونجرس واعداء اوباما السياسيين هيسيبوه مثلا ومايستغلوش الظروف..انشفوا بقى وشوفوا الدنيا بتقول علينا ايه منهم اوباما نفسه اللى عايز يحتلنا..اما عن ايران..فهى اصلا مش عدو وعندها ثورة..ومن الاخر لا ينصح باحتلال دولة قامت فيها ثورة وتعداد سكانها تمانين مليون

السؤال الثامن عشر..ايه العلمانية ولعياذ بالله

العلمانية مش معناها الكفر والالحاد..فصل الدين عن الدولة تشريف للدين والمثال واضح وقريب..لما شيخ الازهر اتدخل فى السياسة وفتى بعدم جواز صلاة الجمعة وقت الفتن لاجهاض جمعة الغضب والبابا شنودة لما قال ولادنا مايتظاهروش ودة كان تأييد منهم لمبارك..ايه اللى حصل؟ ماحدش سمع كلامهم ....وبقى ايه منظر الازهر وكنيسة الاسكندرية؟ مش كان احسن مايتكلموش

ومايتدخلوش فى السياسة؟..شفت لما السياسة بتدخل فى الدين ايه اللة بيحصل؟..شفت ايران مثلا لما رجال الدين ايدوا الثورة المصرية وبعدين قتلوا المتظاهرين المؤيدين لنفس الثورة؟

ومشكلة العلمانية انها كلمة بقت سيئة السمعة من تأثير النظام

السؤال التاسع عشر: طب انا ليه حاسس بالقلق

منطقى جداً...دى اول ثورة تشوفها...والوضع جديد ولازم تقلق ولازم تتفائل..اسرائيل فقدت حليفها الاول والشعب فاق..وانت لازم تبتسم وتشكر الشباب اللى ماتوا علشان انت تخلص من عصابة مبارك

السؤال العشرين: طب انا مين وتبع ايه ونزلت المظاهرات ولا لأ واخدت لك كام رصاصة؟

انا اسمى عزت امين ونزلت او مانزلتش دة بالتعبير السياسى "شأن داخلى" وكل ثورة وانتم طيبين

شويه هنوصل يامصر شدى

2011-02-10T05:38:00.000+02:00

مفيش بطحه....بس علشان اللى ميعرفش يعرفنا

2011-01-07T11:02:00.001+02:00

فما بالكم باصحاب الكتاب؟ أحق بالأمن.

هذا هو ديننا ولو كره المنافقون الفاسقون الكافرون.

اللهم دبر لنا واختار لنا فنحن لا نحسن التدبير...يارب اصبحنا عاجزين إلا من الدعاء فتقبل منا ما نقدر عليه وارزقنا بعون ومدد من عندك لنفعل ما لا نقدر عليه او اجعله صدقه من عندك تصدق بها على عبادك وانت تعلم ما بى قلوبهم
اغثنا يا الله

تدوينة العزة فى ذكرى الحرب القذرة على غزة

2010-12-27T16:37:00.000+02:00

أخى جاوز المتخاذلون المدى

فحق الهوان وزاد العدا

ليه؟

2010-12-22T00:38:00.003+02:00

السلام عليكم ورحمة الله وبركاته

اسئله كتيرة هاتجنن بسببها قلت اشرككم معايا

وياريت تجدوا لى اجابات

ليه بنستقوى على الضعيف اللى اقل منا وننكسر للاكبر منا؟

ليه بقينا نكيل بمكاييل؟ مش مكيالين اللى مكنش عاجبنى زمان... وبقينا ننصب نفسنا حكم وقاضى ومنفذ احكام؟

ليه بقينا جافين وبدون مشاعر وقلوب كالحجارة صورة مؤذيه لا تؤثر فينا طالما لفقير ويا حرام ونتقهر لو لحد غنى ومركز ومكانه؟

ليه تدخل بيتك مكشر وانت كنت لسه بتضحك وآثار الضحك على وشك متصبغتش بلون التكشيرة المصطنعه؟

ليه تجرى تساعدى جيرانك واصحابك ...ولو مامتك طلبتك تقولى مش فاضيه مشغوله العيال وابوهم؟

ليه لما يكون الموضوع هيبقى فيه فلوس ممكن تصحى من الفجر تنزل وتسافر لو الف كيلو ولو صلاة الفجر تصليها فى البيت؟

ليه لما حد فى الشغل ينرفزك تمسكى نفسك ولو جوزك اتنرفز تردى وتزعقى وتحسسيه ان الدنيا سودا؟

ليه لما حد يطلب منك خدمه تجرى تعملها بسرعه علشان عارفه ده هيسمع فى العيله والجيران وأهل بيتك لو احتاجوا شئ تطلع عنيهم وتخليهم هما اللى يعملوا طلباتهم طالما مفيهاش منظرة؟

ليه لو اختك طلبت منك خدمه تردى وتقولى مقدرش ظروفى مش تسمح عيالى بيذاكروا وجوزى مش راضى ..ولو واحده صحبتك؟ جرى تعملى لها الخدمه..هو احنا زى القرع نتمد لبرة؟

ليه لو حد طلب منك فلوس سلف تديه بس بشرط تبقى متأكد انه معاه بس مستنى يجيله له تحويله من برة او البنك اجازة لكن لو حد فقير تقول واضمن منين يرجعهم؟؟؟ طيب هو انت بتسلف علشان تضمن فلوسك ولا علشان تفك عسرة اخ لك؟

ليه لو ابنك طلب منك تعملى عزومه لاصحابه تخلى البيت كله واقف على رجل واحده ولو بنتك قالت لك صحبتى جايه عندى تزعقى وتقولى لها معندناش حد يتعزم وتكسرى خاطرها؟

ليه تبقى صبور وطويل البال حتى مع البواب ..ومع مراتك وعيالك تزعق وتشخط وتنطر؟

ليه مع عيالك عصبيه ونكديه ومع عيال اختك ولا ولاد الجيران طنط لطيفه اللطيفه؟

ليه بتعرف ربنا فى كل اللى يخصك واللى انت حاسس انه حقك ...ولما يجى الحق لاختك ولا مراتك تعمل عبيط ومدرستهوش فى المنهج؟

ليه لما يكون لك حق تصرخى وتطالبى بيه ولما لاخت جوزك حق ترفضى انها تاخده وتقولى مال عيالى..تأكلى عيالك مال حرام يا مفتريه؟

ليه لما تكلم مراتك تستفزها وتقول لها كلام مش حقيقي لمجرد انك حاسس انها صح وانت اللى غلط وعاوز تخرج من الليله كسبان... ومع الزميلات فى العمل تتكلم بكل احترام؟ هو انت بوشين ؟

ليه لما مامتك تيجى تبات عندك البيت يبقى كله روائح ما لذ وطاب واحسن سرير واحسن مكان واحسن كل حاجه..ولو حماتك جت عندك يبقى يادى الشيله ويادى الحطه (مثل ريفى سمعته)

ليه لو مراتك قالت لك نصيحه تبقى كخ ويع وكلامها يودى النار وتانى يوم تنسى انها قالته لك وتفرح ان واحد صاحبك قاله لك وعايز تنفذه علشان فيه خير لك؟

ليه بنفرق بين عيالنا بنات وأولاد؟

ليه بنفرق بين امى وحماتى ؟

ليه بنعامل أهل البيت بقسوة وبرة البيت يتقال ده راجل لطيف محصلش وطيب ودى ست آيه والعكس قائم فى البيت؟

ليه بنتعامل بكذا وش ليه؟

ليه بنغضب لاقل شئ واهيف شئ وليه مش بنشوف غير مصلحتنا بس؟

وليه وليه وليه اسئله كتيير تعبانى

انا فى اللى فات موجوده وانتم وكلنا

ليه منبقاش واحد صحيح؟

ايه اللى خلانا كده ...التربيه الغلط ولا الظروف الاقتصاديه ولا النفس الضعيفه ولا هو احنا كده ولما العدد زاد والاحتكاك زاد العيوب بانت وظهرت وبقت سيول من العوارت النفسيه والاخلاقيه

يارب موته بعد توبه توبتها انت على وقبلتها يارب خرجنا منها بسلام

طلب أخير

ياريت نحيى الحديث ده فى انفسنا

حديث الرسول صلى الله عليه وسلم

لايؤمن أحدكم حتى يحب لأخيه ما يحب لنفسه

محاوله لإنعاشها

2010-12-09T23:33:00.000+02:00

مدونتى الاخرى تغط فى نوم عميق اريد انعاشها برايكم

هذه قصه نشرت منها جزئين اتمنى ان اعرف رأيكم هناأو هناك

الجزء الأول

الجزء التانى

إفهمنى من فضلك

2010-12-03T22:25:00.001+02:00

السلام عليكم ورحمة الله وبركاته

تكملة لموضوع احترمنى من فضلك ولان ناس كتيير ردوا على البوست من خلال وجهة النظر الاخرى

مدافعين عن الاشخاص اللى اتهمتهم بالتقصير......لانهم لا يهتموا بمن يتكلم معهم ولانى شايفه انه من حقهم يدافعوا عن معانتهم مع الاشخاص أمثالى... المطالبين دائما باشياء قد تكون من وجهة النظر الاخرى ...تعدى على الحريات

لذا اسمحوا لى اعرض وجهة نظرهم بطريقتى ثم ان شاء الله آخر البوست أضع التعليقات

دائما ما تجد بعض الناس تطالبك بان تستمع إليهم فى أوقات غير مناسبه بالنسبه لك...أقرأ مقاله مهمه ..ومستغرق فيها تأتى زوجتى وتطلب منى ان استمع إلى كلام ممكن ينتظر....من وجهة نظرى لأرى ستنهار الدنيا اذا لم تحكى الآن

ولانها تلح فى الطلب فاتظاهر إنى اسمعها... وإلا هتقوم الدنيا ومتقعدش فقلت اختر حل وسط اقرا ونفس الوقت اعمل نفسى بسمعها علشان متزعلش منى

اجد فى المقابل ثورة عارمه انى لا اهتم وانى مش بحترمها وانى متعلمتش وانا صغير آداب الحوار....

طيب هى كمان متعلمتش إمتى تختار الوقت إلى تتكلم فيه معايا...ولا أنا عبد اشتراه لها والدها علشان يسمعها وقت ما تحب ويجيب لها طالبتها وقت ما تطلب؟

طيب انا هاشهدكم كمان ....اكون بتفرج على ماتش وخلاص ضربة الجزاء هتدخل الجون تقف وتقولى عاوزة اقولك على موضوع الجراج ومش عارفين نركن العربيه والناس مغلسين

طيب سيبى الراجل يركن الجون الاول وبعدين تعالى قولى

ابدا" تقف وصوابعها فى وشى علشان انا مش بحترمها ولا براعى آداب الحديث

طيب اوقات تكون بتكلمى...ووبعدين عيل من العيال انا شايف هيإذى نفسه ولازم اكلمه علشان ينتبه...هى تقولى انت مش بتحترمنى وبتقطع كلامى وتكلم العيال

و تقاطعنى وتقول كلام ملوش دعوة بحديثى معاك

وتتجاهلنى

طيب ساعات بقاطعها علشان افتكرت حاجه خايف انسى وهى مش بتنسى..

والله مش عدم اهتمام بس اختلاف توقيت وكمان اختلاف اهتمامات طيب الحل ايه

اقفل بؤى خالص؟

وبالنسبه لموضوع الرد على المدونات والنت...احيانا ميكنش عندى وقت ارد علشان مستعجل هاقوم وبنسى ارد واتشغل ويجى فى بالى مقاله جديده أكتبها وأاقول هارد على الاتنين وانسى واتشغل

ساعات حد يكتب فى وسط الردود رد مستفز قد يمسنى شخصيا ولازم ادافع عن نفسى أو يمس العقيده فلازم ارد ولا انتظر الدور...وبعدها انشغل برضه ومعرفش ارد على الناس.بس مش مقصوده

يعنى الواحد لازم يفوت للناس علشان الناس تفوت له...ولا إيه رأيكم

************************************************************************

طبعا ماسبق محاوله منى لإظهار وجهت نظر الآخرين والآن التعليقات على البوست

كتب الاستاذ (وجة نظر)

الكلام إلي قلتيه فرضيات تعتمد على المواقف، وكل موقف في الحياه مختلف تماماً من لحظة لتانية حتى لو كان لنفس الشخص. إيه معناها إن واحد ييجي يفرض علي وقته وفكره في لحظة أنا مش مستعد فيها وأكون مضطر علشان مكنش قليل الذوق أسمعه ب-100% إهتمام؟ وحتى لو علشان مبقاش قليل الذوق اديته 10% إهتمام يبقى كويس. يمكن الموضوع مايهمنيش؟ يمكن الموضوع يتأجل؟ ليه يتفرض علي أسمعه دلوقتي بإهتمام 100% ؟ يبقى في المقابل في حاجة اسمها ذوق إختيار توقيت عرض الموضوع. و في كمان ذوق طريقة عرض الموضوع. يبقى إلي بيعرض الموضوع لازم يسأل الأول هل الوقت مناسب ويبقى عنده حسن تفهم لو ماكنش مناسب.

لو بشتغل في مكان لازم أسمع للعميل يبقى ساعتها مفروض علي تركيز 100% طول الوقت حتى لو مش عايز.

لو قلت إن الوقت مناسب لمناقشة الموضوع يبقى ساعتها لازم كل اهتمامي يكون لسماع الطرف الأخر، و حتى كمان ممكن في نص الموضوع أبدي رغبتي في إنهاء العرض لأن الموضوع مش إختصاصي أو مش مهم لي أو حله مش عندي أو أي سبب تاني.

أنا لما اتصل بأي حد فالتليفون علشان أسأل عليه أو أي سبب أخر لازم أسأل الأول إذا كان الوقت مناسب أو الشخص مشغول أو خارج أو بيلعب مع ولاده.... إلخ ... لأني ببقى مدرك اني بخترق وقته إلي هو ملكه هو (وخصوصاً مع وجود الموبايل إلي بيجيب أي حد في أي حتة) .... طيب مش حتصدقي إن في ناس كتير بيقولولي معلش احنا مش فاضيين دلوقتي وحنكلمك لما نخلص، وباحترام فيهم دا جداً، أحسن مأبتدي أتكلم وحس انهم نفسهم أخلص وموجعش دماغهم.

موضوع بنتك دا مثال لعدم إختيار الوقت ومثال لإختراق وقتك. ومش ممكن حد يجيلي ويقولي يا عم مانتا قاعد تتفرج على المسلسل التركي .... يعني أنا موضوعي أهم .... موضوعك أهم بالنسبالك، بالنسبالي أنا المسلسل أهم.

في طبعاً مواضيع لازم تتناقش في ساعتها، زي لما مراتي تيجي تقولي المدرسة كلمتني حالاً والولد ........ أي حاجة. ساعتها برضه أنا إلي احدد حسيب إلي في ايدي واتكلم ولا لأ ..... لأنه في كل الأحوال لازم حسمع اني راجل مش مسؤول ومش بهتم ..... فاسمعها في الوضع إلي يريحني (:

تحياتي

كتب الاستاذ فشكول ايضا توضيح

فعلا .. ساعات كتير اكون مهتم فى شيئ ومركز معاه وييجى حد من العيال او الحاجه يتكلموا معايا وانا عايز اسمع التليفزيون وخصوصا انى لا اسمع الا قناة الجزيره واون تى فى والعربيه واحيانا سى ان ان والجزيره الثقافيه وايضا قناة دبى الوثائقيه .. غير كدا مش بشوف التليفزيون .. وطبعا كل او معظم البرامج فى القنوات دى عايزه الاهتمام والتركيز .. عشان كدا مش باكون معاهم ومع القناه قلبا وقالبا ومخا وودنا.

الاستاذ وجهة نظر والاستاذ فشكول كانوا بيدفعوا عن وجهة النظر الأخرى

يمكن مكنش دافعت عنها بشكل كويس لانى مش فى الجانب ده بس حاولت اتخيل بيفكروا ازى وكان دليلى الاستاذ فشكول و الاستاذ وجهة نظر رغم اعتراضى على اجزاء كتيرة من توضيح الاستاذ وجهه نظر

وارجو من لديه دفاع عن الرأى الاخر يوضح لنا يمكن نقدر نفهم بعض يمكن فعلا اوقات مش بنعر نحترم بعض لاننا بنحترم رغباتنا فقط

اسفه على ازعاجكم ويارب يكون الموضوع وافى

احترمنى من فضلك

2010-11-25T13:32:00.068+02:00

السلام عليكم ورحمة الله وبركاته

كل سنه وانتم طيبين

الحقيقه ارغب فى الكلام فى اكثرة من نقطه وتخونى كلماتى وترتيب أفكارى ...ولكن إن شاء الله سأحاول إنى اكون مرتبة الافكار ومترابطة الجمل والكلمات

من خلال تربيتنا اتعلمنا زمان حاجه ...يمكن أيامنا كانت طبيعيه وهى لما حد يكلمنى أعطيه كل إهتمامى ...ولما حد ينده علىّ أرد بسرعه وأستجيب للنداء

الغريب بقى ان الكلام ده مش بشوفه الايام دى..تكلم الانسان من دول فى حاجه مهمه تلاقيه يا إما بيتفرج على التلفزيون ومهما نبهته لأهمية الموضوع تلاقيه يقولك ايوة ايوة معاك...وممكن كمان يكون بيقرأ جرنال فى نفس الوقت

...حد هيسألنى طيب قلة ذوق انك تكلمه وهو مشغول ...طيب لو الامر مهم...لو حاجه محتاج رد فى نفس الوقت؟ طيب لو لقيته بيقولك إتكلم إتكلم أنا معاك!!!!!! أنا سامع اهوه

مش عارفه معاه إزاى؟

وتبدأ تتكلم فعلا ....على أمل إنه هيسمعك أكيد طالما قال اتكلم...وتفضل تتكلم وتتفاجئ انك بتكلم ايوة بالظبط تمثال ليس فيه أى علامه من علامات الروح او انه شخص حى

أول ما تسأله فى الكلام اللى عمال تحكى وتعيد وتزيد تلاقيه بيقول ...ها ايه انت كنت بتقول ايه اصلى سرحت شويه!!!!!!!!!!

سرح؟ لا طبعا هو مش موجود من الأساس وده يديك انطباع ان حضرتك كلامك مش مهم وزى قلته وبالظبط هيبقى الموضوع بالنسبه له ولك زى الصورة دى

طيب لو انت اعترضت وقلت له لو سمحت الموضوع ده بيضايقنى...وياريت لما اتكلم تهتم شويه علشان زمان علمونا آدب الحديث والاستماع هى

1- عليك أن تستمع بكل اهتمام لمن يحدثك حتى تفهم جيداً ما يقصده.

2- لا تجهز الرد فى نفسك وأنت تستمع له ولا تستعجل الرد عليه.

3- اتجه بجسمك كله لمن يحدثك فإن لم تستطع فبوجهك على الأقل حتى لا يشعر المتحدث أنك تهمله.

4- لا تقاطعه أبداً ولو طال الحديث

5- بعد أن ينتهى المتكلم من حديثه لخص كلامه بقولك:أنت تقصد كذا ,صحيح؟
فإن أجاب ب"نعم" فتحدث فى هذا الأمر وذلك حتى لا تفهمه خطأ.

6- لا تفسر كلام المتحدث من وجهة نظرك أنت وحاول أن تنظر للأمور من وجهة نظره هو ثم تحكم بالصواب قدر المستطاع

هيكون رده حاجه من اتنين إما هو انت هتعلمنى الأدب ..او يقولك طيب مهو أنا بعمل كده فعلا" وفى الحاله دى تأكد إنك قدام شخص

لا أمل فى علاجه تمام ...

والحل انك تتألقم على الكلام مع نفسك

لانه لن ولن يهتم عندما تتحدث....طيب.

ممكن تعمل حاجه علشان الاخ ده أو الاستاذه دى تحس قد ايه هى لا تحترم ولا يحترم من أمامه

ايوة بالظبط تعمل كده معاه

هتلاقيه بيقولك وهو غضبان جدا"

كلمنى رد على شيل القطن من ودانك ...احترمنى!!!!!

اللى يغظيك بقى ان فى ناس لما تعاملهم بمعاملتهم يتنرفزوا عليك ويعملوا مشكله

وفى برضه من الطرق المختلفه لتجاهل اللى قدامك انك وانت بتكلمه يقعد يكلم حد تانى يعنى يكلم طفل أو الشغاله أو يسيبك تتكلم ويرد على التليفون ...مع إن ممكن أى حد موجود فى المكان يرد على التليفون...ويسلام بقى لو انت بتتكلم فى موضوع حارق دمك وهو بيسمع لك وبعدين يقولك فى وسط ثورتك وانفعالك..مش انا اشتريت النهارده كذا..أو مش فلانه جات من السفر أو الممثله دى جامده موت بتخلينى اعيط

عيطوا ..................

أو حاجه تانيه تلاقيه سرحان وعنيه فى عنيك اتاريه بيفكر فى موضوع تانى ومشغول هينفذه أمتى

طيب ده نوع من التجاهل وعدم إحترام اللى قدامك....

فى عالم السيدات والرجال الكثير ليقال بس المشكله دى بتعانى منها الزوجات

والابناء مع الاهل...ممكن يجى ابنك يكلمك متردش عليه او تتشغل باللى فى ايدك او كتابتك على الكومبيوتر

انا بعمل كده مع بنتى وبتزعل وبحاول معملش كده بس بكون بكتب شئ مهم وجالها نوبة رغى مفاجأة

فبحاول اراضيها اسيب اللى فى إيدى بس لو حاجه مهمه بمارس اموتى على حق وازعق واحمر عنيا ...هى تمشى وترجع تانى ...زى مايكون مربوطه بحبل اليويو تبعد وترد بعد قليل ...بس دى طبيعه الصغار لا ملل ولا زهق ولا يأس

نيجى بقى لعالم النت والتدوين

مثلا انا واحده من الناس عندى عيب خطير ..مش بعرف ارد على الناس- اللى جبرت بخاطروردت على كلامى- بسرعه يعنى لازم استنى شويه علشان بعد ما بكتب أى بوست ينتابنى فتور تام ورفض لا إرادى انى اكتب أى شئ

ولكن لا أترك أى بوست دون الرد مهما غبت او طالت نوبة الرفض دى

بس فى المقابل بلاقى ناس تروح تكتب عندها مش منظره ولا رغبه منك انهم يجيوا عندك خالص فقط عاوز تتناقش معاهم أو تعلق على المقاله أو القصه أو تستوضح شئ هو كاتبه

هتلاقى نسبه من الناس إللى مش بترد مش هترد خالص

ومنهم يرد على واحد أو اتنين...شئ استفزهم فى تعليقات الناس فحبوا يردوا وده معناه طالما بتقرأ التعليقات يبقى احترم الجميع

ومنهم إللى يرد دائما رد جماعى زى كترخيركم ..شكرا على الإهتمام

ساعات بنضطر جميعا لهذا الرد الجماعى بس مرة مرتين فى السنه مش هو ده النظام.

طيب ممكن تكتب عند كتابة التعليق ..اعتذر عن الرد لانى ليس لدى وقت وانا بكتب مقالات والهدف منها كذا وكذا

يبقى انت احترمتنى ...واذا انا حبيت ارد او لاء هابقى عارف انك احتمال كبير متردش على

وفى ناس زى مجداويه احنا اللى قلنا لها سيبى التعليقات عايزين نتواصل حتى لو معندكيش وقت...كانت صريحه وقالت مش بتقدر ترد وقتها لا يكفى ورغم كده برضه بتتواصل

الموضوع مش إجبار الموضوع احترمنى زى ما بحترمك

طيب انا بروح عند كذا مدون ...مش بيجوا عندى ومش بتضايق انهم مش بيجوا بس مبسوطه منهم لانهم بيردوا على لما اكتب عندهم

صدقونى احترام الغير أو على الاقل جبر الخواطر على الله

من الناس إللى تحترم من يكتب عندها ستيته حسب الله الحمش ..فعلا حد يستحق انك تروح وتقرأ تعلق او متعلقش هى بتحترم اللى بيقرأوا لها تحيه لها وجربتروح مدونتها هتعشق اللغه اللى بتتكلم بيها وهتحب التدوين لانك هتحس فى روح هناك ماشاء الله عليها فعلا تحترم اللى قدامها

اه اللى ميردش على لا يحترمنى ولا يحترم زيارتى له

انا لما اجى ازورك فى مدونتك يبقى كأنى فى بيتك متكلمتش ..خلاص انا ضيف عدى واتفرج من برة اتكلمت وعلقت وناقشت يبقى حقى انك تحترمنى وترد على...

الفترة الاخيرة زادت نسبه تجاهل المشاركين ...مش عارفه ده استغناء ولا عدم رغبه فى التواصل ولا طبيعة الامور من وهج لفتور

على كل حال الخلاصه بشلا لما حد يكلمنا نعمل نفسنا سامعين ونتجاهل التواصل والرد

بلاش لما حد يكلمنا نرد على موضوعه بموضوع بعيده وملوش لازمه

ياريت نحترم بعض علشان احنا كل يوم بنفقد شئ جميل فى علاقتنا ببعض

كلامى لا اقصد به مدونين او ناس فى النت بعينهم...ولكنى تصرف بعضهم هو اللى الح على فى كتابة الموضوع.

اسأل الله لى لكم الاخلاص وعمل كل ما يقربنا اليه

ملحوظه الصور اللى فوق دى كان لابد منها لتوضيح مدى أهمية الموضوع... يعنى مش حب للصور والرسومات

انا كبرت على الموضوع ده بس موضوع البوست قاتلنى

الصور دى ساعدتنى فيها وجابت معظمها ...كلمات من نور توأمى وحبيبتى تحيه لها ربنا يسعدها ويبارك فى اسرتها

لن يعودوا ابدا

2010-11-05T00:50:00.000+02:00

يشعرون بالندم بعد ان يفقدوهم...وعندما كانوا يحومون حولهم -حبا ووعشق-كانوا يرفضونهم( الأحبه)

يستهترون بها وكانت تملأ حياتهم قوة وقدرة وصلابه (الصحه)

الآن يتمنوا لحظة واحده حتى يستطيعوا ان يشموا عبيرهم الذى كان يلف المكان وهم لا يدركون

ينتظرون وينتظرون...ولكن عندما يمر القطار لا يرجع للخلف

لا تنتظرحتى يأتى وسيأتى الندم.... فأنت مقصر, ولن تحتمله

ولا تستسهل الفراق لانه مدمر...

ولن تعتاد البعد لانه مع كل يوم بعاد يزاد الشوق ويزداد القرب...وينفجر الحزن والحرمان

قبل ان تندم راجع نفسك قد تستطيع ان تلحق بالقطار قبل الرحيل لانه لن يعود ابدا"للخلف لتلحق به

كراكيب...... جوة .......وبرة

2010-10-25T06:46:00.001+02:00

كلنا عندنا كراكيب فى بيوتنا فى عربيتنا فى شنطة الايد للسيدات والمحفظه للرجال....

كمان بتزيد مسألة الكراكيب بقى للستات فى البيت ..وبعض الرجال اصحاب الوظائف المهنيه الحرفيه برضه هتلاقى عندهم كراكيب

مشكلة الكراكيب ده كنت بعانى منها وانا صغيرة فى بيت أهلى كنت دايما ااقول لازم اتخلص منها لما اتجوز

وبعد الجواز طبعا البيت كان فاضى وبدأت اكتشف انى حامله جين محب للكراكيب

كل حاجه هتنفع

ابويا الله يرحمه كان دائما يقولى ارمى الاشياء اللى مر عليها وقت ومستعملتيهاش بلاش تكركبى الدنيا.... بس أمى حبيبتى كنت زيها , كل شئ هينفع.

ااقوله حاضر ان شاء الله ...وابدا حملات شعواء لجمع الكراكيب ...وبعدين اكتشف إنى وانا اثناء الحمله عماله احط ده على جنب ..خساره هينفع لما الماسورة تتكسر...ودى هتنفع لما القماش تدوب...ودى هتنفع اعملها قدام شويه خيشه ...وانا لا امسح بيدى لمشاكل ظهرى...يعنى بضحك على نفسى

وده غطا وده زجاجه هاعملها مقلمه ولا هاعملها زهريه

يمكن مشكلتى انى بعرف استغل الاشياء واعمل لها إعاده تدوير...بس للاسف اكتشفت انى عماله اكركب الدنيا ومش عارفه اعمل ايه

جبت دولاب ولميت فيه الكراكيب وقلت كده خلاص مفيش كركيب تانى...وشويه وإيه اللى حصل؟ كل الاماكن الفاضيه بقت كلها كراكيب من تانى
...حتى عند باب الشقه قلت احط كارتونه كبيره اجمع الكراكيب وارميها ..بقت الكارتونه ديكور فى البيت وبيقت اجيب مفرش شيك اغطيها بيه علشان شكلها ميبقاش وحش

طيب ما أخلص وارمى الكراكيب إللى فيها...أخدت القرار وقلت لمرات البواب هاديك الكارتونه دى تتصرفى فيها بس يومين كده وانده لك...بعطى نفسى فرصه استمتع بكراكيبى اطول وقت ممكن .

مش بكتب البوست ده فرحانه بنفسى ولا عاجبنى اللى أنا فيه

بس عايزة اولا حاجتين

نبص للكراكيب اللى جوانا قبل كراكيب بيوتنا...يعنى أكيد كل واحد فينا شايل شوية كراكيب على جنب يطلعهم وقت العوزة...والحقيقه مش هانسى مديرى فى الشغل اثناء ما كنت فرد عامل ...كان يقولى اوعى تجترى زى الجمال وطلعى اللى جوه وارمى

كراكيبنا بنجترها زى الجمال وتسود عيشتنا...زى كراكيب البيت مهى مبهدله بيتنا

ثانيا طلب مهم من الكل ازاى وبجد وبشكل جدى اتخلص من الكراكيب إللى فى البيت ودمتم اصحاء لستواا من مدمنين الكراكيب ولا اسرى لها

ملحوظه...اخدتم القرار ولا بعد يومين زى؟؟

الصور جبتها من على جوجل بس بالصدفه فى تدوينه للعلاج من مرضى ادمان الكراكيب هاروح اقرأها واتعالج واجيب للمرضى منكم زى اللينك

تدوينه فى مدونة أنا والغربه ( خواطر)

2010-10-15T06:10:00.001+02:00

كلنا نخرج من الدنيا بحظوظ متقاربه

فى ميزان حسناته إن شاء الله

عادى ...شوية رغى لا هيجيب ولا يودى بس اه تفريغ شحنه

2010-10-09T04:08:00.004+02:00

السلام عليكم ورحمة الله وبركاته

هقول شوية حاجات ارتجاليه يعنى مش مترتبه...لانى حاولت كتيير ارتب لقيتنى مش هاكتب

والضرب على الكى بورد للكتابه له وحشه ميحسش بيها إلا الناس إللى اتعودت تتواصل مع غيرها عن طريق الكتابه

اظن واتخيل ان معظم المدونين كانوا بيحبوا يكتبوا رسائل وهما صغيرين..كانوا فى فترة فى منتديات مشتركين وينتظروا بفارغ الصبر الرد على مواضيعهم....والتطور الطبيعى للرسايل والمنتديات التدوين

واحده صحبتى بحبها قوى قالت لى يا أم البنات المدونات زى النقوط فى الافراح

التعبير غريبه بس عاجبنى قالت لى لو نقطى فى فرح الناس هتنقط عندك..يعنى لازم اروح ازور

المدونات علشان الناس تزورنى..طبعا فى يوم من الايام كنت بعمل كده وناس كتيير كانت وممكن مازالت بس الهدف مختلف

بزور علشان الناس تزورنى وتقرا لى وتفهم شئ وتتعلم شئ وتسمع نصيحه..ولا علشان يبقى عندى زوار كتيير... والست المهمه اللى عدد الردود عندها بالمئات

المهم يعنى فكرة المدونات اوقات كتيير بتبقى تبادل اهتمام ورد عندى وعندك

الحقيقه انا دلوقت بدخل أعلق على الموضوعات اللى تعجبنى

واحيانا يقع فى سكتى حد مهبوش فعلشان ارحم مدونتى ونفسى من التطاول بعلق بغير معرف

جبن يمكن...بريح دماغى ممكن...مقدرش اصنفها غير انها نوع من الهروب من وجع الدماغ ونفس الوقت ابقى علقت وقلت رأى..ومعذرة عند الله

ساعات بقى نبقى محتاجين نسمع كلام من الناس علشان يؤيد موقفنا أو يشجعنا أو يدينا رأى

وساعات بنكتب رغى وخلاص...زى ما بعمل دلوقت...برغى علشان عاوزة افضل موجوده بينكم

انا كل يوم خميس بليل او جمعه الصبح احاول اكتب او اعمل حاجه معرفش اروح ازور مدونه او اتنين اعلق عندهم وبعدين امشى....وبعدين لقيتنى عايزة اكتب بعض الجمل...ملهاش دعوة ببعض بس كمان متنفعش بوست..

قلت طيب ايه يعنى لما اجمعهم مع بعض ويبقوا شوية تأملات يعنى منى امارس هواية الرغى والكتابه..ومنى استرزق بدعوتين لو الكلام كان كويس ومنها

اخلى كلمات من نور توقف تهديدها لى بعمل ريبورت فى الفيس بوك علشان ابطل دخوله

وبرضه اشحن البطاريه وارجع اكتب واقرا

على فكرة انا كنت بستفيد قوى وقت ما كنت مداومه فى المدونه...مش من تدويناتى لاء من تدوينات الغير

كنت بدخل عند مدونين فى عمر اولادى ماشاء الله افهم حاجات واسأل عن حاجات ومدونين اخوت لى برضه بتعلم منهم

يعنى أنا المستفيده

طيب قبل ما مشى اكتب لكم الكلمتين اللى كتبتهم فى الفيس بوك وخلونى ااقول لازم ان شاء الله ارجع تانى اقرأ واتعلم وانغمس بين سطور مدوناتكم

بس كلمه قبل الكلمه

بلاش تعليقات على تعليقات الناس...علق على حاجه عاجبتك ..أو سيبك منى بلاش تكتب جمل

لا هتنفعنى ولا تنفعك

محدش يزعل منى بس ساعات التعليقات تحول مسار التدوينه

وبما إنها تدوينه فظيعه هايله يعنى منتهى الهيافه...فبلاش تدخلونا فى السياسه

على فكرة الرغبه فى التواصل والتواجد بين الناس بتخليك تكتب وترغى وخلاص

اخير الكلمة اللى كتبتها فى الفيس بوك يارب تعجبكم

**************************************************************************

فى زمن بعيد لم تدرك حدود معالمه حواسى الضعيفه

قررت أن أكتب فبحثت عن قلمٍ فوجدت كل أحبارى جافه ، فقررتُ أن أكتبَ بالرصاص...فلم أجد لقلمى طرف ولم استغرب, وانتظرت قليلاعسى أن أجد لهذا مخرجا".

وأدركت اننى إذ لم أستطع الكتابه ...قد أستطيع العزف ...فبحث عن قيثارتى فوجدتها دون أوتار, ثم نظرت حولى لعلى أجد شئ آخر أعزف عليه فلم أكن فى عمرى هذا أتعاطى اليأس والملل،فبحثت عن ناى الصغير ...فوجدته ينظر إلى بحزن من فقد الاحساس والشجن فمسكته بيدى لعلى أجد لهواء صدرى المشتعلُ مخرجا". واثناء عبثى بالناى وجد بداخله قلما" رصاص له طرف وحرف ويلمع سنه مثل سن الرمح قبل النزال.احضرت اوراقى التى يفوح منها عطرى المفضل والذى كلما غازل عبيره أنفى يأخذنى إلى مروج الفل والياسمين.وضعت قلمى بجوار اوراقى وبجوراهم الناى...وذهبت لاحضر فنجان من القهوه , حتى تختلط رائحته المنعشه باريج اوراقى المشبع بالفل والياسمين ,بدأت اسطر مشاعرى ومعاناتى وكل هواجسى حروفا أنسج من غزلها ثوب .كلما ارتديته اشعر أنى معلقه بين السماء والارض, وان روحى لم تعد تستطيع مقاومة العذاب ,ورغبة منها فى الخلاص تحاول ان تقلل من حمل الثوب فتمسح بعض كلماتى....وكثير من حروفى.

زعلان....؟؟؟؟ إتفلق !!!!!!!!!!

2010-07-30T19:19:00.002+03:00

السلام عليكم ورحمة الله وبركاته

العلاقات الانساينه شغلانى جدا" مش عارفه ده سببه ايه

حساسيه..ولا فراغ يعنى..ولا ناس غاويه وجع قلب؟

معلهش استحملونى ...رمضان قرب وهترتاحوا منى ومن اسئلتى

عاوزة أعرف لو انت زعلان من حد هتقوله أنا زعلان منك...ولا هتسكت لغاية ما تروق من ناحيته... وتحس انك قادر تتعامل معاه بكل مشاعرك

طيب وبعد ما تروق بتكون روقت فعلا؟...ولا من فوق الوش

فى ناس متقدرش تتعامل مع أى حد وقلبها زعلان,

وفى ناس بتتعامل مع الكل وقلبها زعلان,

وفى غيرهم بيتعاملوا فقط مع اللى ميهمهمش واللى يهموهم لازم يعاتبوهم.

هل تعرف أهميه العتاب

فى ناس تقل العتاب نقصان عقل.

وفى ناس تقول العتاب محبه.

وفى ناس تقول العتاب يجر المشاكل.

فى ناس تحب لما يكون حد زعلان منها يصارحها,

وفى ناس لو حد صارحها تهاجمهم وتقلب الموضوع عليه.

يعنى لو جيت قلت له مراتك زعلت مراتى يرد عليك ويقولك مهى مراتك كمان قرفت مراتى...يعنى مش هيسألك ايه الموضوع

لو قلت له عيالك بيعملوا كذا هيقول لك عيالك بيعملوا ويسوى ويبهدلوا الدنيا

طيب يعنى تسكت...ولا تصارح.؟

ولا هى معتمده على دماغ اللى بتتكلم معاه ونفسيته.؟

ساعات مقولش لحد على حاجه زعلتنى..وابقى واخده جنب شويه نوع من التعافى من الموقف.... لانه ممكن يعدى لو الواحد بعد شويه..مش طالبه عكننه.

افاجئ ان الشخص اللى زعلانه منه زعلان منى انى مصرحتش بزعلى ...ااقوله فى ناس يتزعل منى لما اصارحها باللى مضايقنى.

سبحان الله البشر انواع واصناف والتعامل معاهم عاوز حكمه وكياسه انا عن نفسى افتقدها..قبل كده قلت معرفش اتعامل غير مع اللى شبهى.

حتى فى المصارحه احب لما ابقى زعلانه من حد أروح أأقوله

وأحب اللى يزعل منى يقولى.

مش بحب التفويت اللى من فوق الوش وفى الداخل بركان يثور فى أى هيافه وخلاص

يمكن مفروض ان الواحد يكون على طبيعته بس عاده مش كل الناس تحب تتعامل بطبيعتها

دايما فى ناس تحب انها تبقى مرسومه,بيقولوا إنه حدود فى التعامل.

بس انا شايفها نوع من التعالى..والتكبر..يمكن كمان نوع من العجز ...مش عارف يتعامل مع الناس.

فى ناس لما تحب حد مترضاش تقولها... وناس تحب تقول,

انا بحب ااقول لما أحب حد..لكن فى ناس مش بتعرف وياريت بتسكت لالآ بتصدك كمان.

الموضوع مش مشاعر رومانسيه ...لاء مشاعر انسانيه ..اخوات ...اصدقاء جيران

يعنى فى ناس تعرف تعبر..وناس لاء

كمان فى ناس تعرف تحتويك وناس تصدك.

مثلا لما حد يقولك أنا زعلان منك...تلاقى الرد إيه

بسم الله الرحمن الرحيم الإجابه

1 – إزعل

2- إتفلق

3هاعملك إيه يعنى؟!

وفى ناس لما تقول لها زعلان منك ..يقول اصالحك...مالك بس؟

هى الحكاية تتلخص فى إن الكلمة الطيبه صدقه...ولا إن دى اخلاق..واساليب ناس,ولا إيه؟

طيب انت مع ان الزعلان يصارح..ولا يستنى..ولا يطنش؟

ولو حاول يتكلم واللى قدامه كبسه ولا صده؟

طيب لو اللى قدامك زعلان منك وحاولت إنت تصالحه وتعرف فى ايه وهو مرضيش...يعنى حاولت كتيير وهو رفض,تعمل إيه؟

هو انا منتظره تفاعلكم ورأيكم علشان كل اللى سبق بيحصل...

أنا حاسه فى حاجه غلط

ملحوظه مهمه جدا"

الشيخ ياسين رشدى توفاه الله يوم الاربعاء 28 /7

رحمك الله يا شيخى الفاضل يا من علمتنى الكثير بقليل من الكلام

إحذروا النظرات القاتله...والهمسات المدمرة

2010-07-23T05:09:00.012+03:00

تحديث
بعد قراءة التعليقات وانتابنى شعور بالحزن
فما قصدت ان يشكر فيا أحد
انا قصدت ااقول لكم بفضل الله ثم مساندتكم ومساندة الناس الطيبين اكتشفت انى مفروض اكون اللى كتبته لكم
انا والله العظيم اقل مخلوق على الارض..ولا اعتبر أفضل أم.
ربى لا تؤاخذنى بما يقولون...واجعلنى خير مما يظنون
و اغفر لى ما لايعلمون .

البوست السابق تحدثت عن قبول الآخر من حيث الاختلاف فى الفكر والتوجه والاعتقاد

النهارده هاسأل انتم قابلين ازواجكم؟؟ زوجاتكم..أولادكم؟

طيب فكروا كده لو لو الإجابه بالرفض هتعملوهم ازاى..؟ هتدافعوا عنهم ؟ لو حد ضايقهم هتسيبوهم منهم للناس؟طيب لو الإجابه لا منقدرش نسيبهم يبقى لازم نراجع نفسنا كويس ونشوف احنا رافضينهم ولا لاء.؟ النهارده انا مش هاتكلم عنا إحنا الكبار .

هاتكلم عن اولادنا الصغار سواء كانوا اصحاء أو ذوى احتياجات خاصه لان الاصحاء منهم الطفل صاحب الحركات الكثيرة والشغب الرهيب ..والذى يطلق عليه هيبر

وهناك الطفل الذى لم نعلمه الأدب...واصبح يحرجنا أمام الآخرين

والطفل المنطوى الذى لا يستطيع ان يقول كلمة أو أخرى دون تلعثم

والطفل المنطلق الذى يتحدث فى كل شئ وأى شئ

ولا يتوقف عند كبير او صغير

كل هؤلاء الصغار فى كفه وذوى الاحتياجات الخاصه فى كفه أخرى. ليه؟ لان فى اعماق نفسك حاسس بتقصيرك مع الطفل فحاسس ان علشان يتعدل ويبقى فى صورة سليمه انت لازم تعانى شويه,من معاملة الناس لان ابنك غير مهذب ..غير سوى بسبب تقصيرك.....

أما لما يكون طفل من ذوى الاحتياجات الخاصه بيبقى عندك شعور وانا ذنبى إيه... ربنا رزقنى بيه كده.

طيب نرجع للطفل السليم اللى احنا قصرنا فى تربيته... علشان ننجح فى إصلاحه لازم نتقبله ونتقبل

معاناتنا فى اصلاحه...علشان الناس تتقبله لاء وتساعدنا كمان

تقبل ابنك هذا ولا تحرج منه ..وتعامل مع الموقف على اساس انك تصلح ما فسد فلا تفكر فيمن حولك

مرة تانيه ليه؟ ؟ لإنه اذا رفضت طفلك سيرفضه المجتمع, اصل الناس بتعامل أولادنا زى ما بتشوفنا بنعاملهم.

والنوع التانى أنا أكثر خبره فيه وابحار ذوى الاحتياجات الخاصه ( اصحاب النعم التى تحل أينما يكونوا)

هذه تجربتى كأم عندها طفله مختلفه..لم لم أكن سبب فى سلوكها بشكل مباشر أو كونها مختلفه ....ولكن هى منه ونعمه من الله

مش بقول لكم فى اعماق نفسى بقول مليش ذنب فى كونها مختلفه...بس أكيد فى ذنب لانها بالنسبه لى مؤشر الالتزام, هى رزق من الله منحنى إياها

وتعلمت مع الوقت ومن المعاناه أنه إذا تقبلتها سيتقبلها الناس.لذا قررت من فترة طويله ان اتعامل مع إبنتى على اساس إنها طفله عاديه ومن حقها التمتع بكل شئ متاح للأطفال الطبيعيين...ولا أخجل من تصرف تقوم به رغما" عنها نتيجه عجزها عن التعبير فتبدأ بالرفض على هيئه صراخ أو رمى نفسها فى الأرض...واذا لم اتعامل مع الموقف بهدوء سيصبح الامر كارثى..وسيتجمهر الناس وممكن نقع تحت طائلة قانون الطوارئ لان عدد اللى يتفرج تخطى المسموح به

برضوا تقبلوا الحاله المزاجيه للاطفال العاديين اذا كنتم عايزين يبقوا كويسين...ربوا اولادكم..ولنفسى قبلكم علشان يوم القيامه قدام ربنا اخلصنا فى تربيتهم...مش علشان الناس يقولوا ولاد أم البنات..ولا علانه ولاد متربيين

خلونى افضفض معاكم .. بصراحه اكتر, ما اقوله لكم الآن وما اكتبه وما اقنع به مريم ابنتى..واحاول ان ابسطه لزوجى ...يدمى قلبى..فأنا أحاول ان اعالج من حولى ويعلم الله أنى مجروحه جرح عمرى كله..لا اعترض وهو يعلم ما فى قلبى, ويعلم كم الرضى الذى احمله فى قلبى المجروح.,

.ولكن قلبى قلب أم يعانى ويئن فى صمت طول الوقت ,وأحيانا اصرخ واعبر عن ألمى.... أحاول تضميد جرح الابنه التى ترى ان اختها احسن اخت فى الدنيا بس الناس بيضايقوها لما يقعدوا يتفرجوا على أختها...

وزوجى الذى يشكو لان الصغيرة تحتاج مجهود كبير وطاقه اكثر من إحتماله... ومن سنه ورغم هذا لا يقصر ...ربى يعينه.

...احاول هنا ..واحاول هناك...وقبلها أحاول مع نفسى حتى تستطيع الصمود...المهم

بدأت اتصرف بشكل أكون فيه قدوة...مهما تفعل الصغيرة احتويها , وأحاول تهدئتها ولا ارضخ لرغباتها ولكن احاول ان نتعامل مع بعض بنوع من اليسر

ابنتى الصغيرة لا تحتمل الصوت العالى ... ولا الصراخ احاول ان انبه النظرات المحدقه والهمسات المسموعه انى بحب ابنتى ومتقبلها فلا شأن لكم فى ما نجريه من حوارات تتسم بالطف أحيانا وباالحزم احيان أخرى.. لانه اذا تعاملت معها بعنف يبدأ الآخرون الاكثر حنو على ابنتى!!...حرام عليك كده..بشويش ولانى عارفه انه كلام وبس فمش بيهمنى منهم ...وبعاملها باللى يريحها..ويبعد فضلوهم عنها...لانه فى الآخر أنا اللى هانظف مكانها أو أنا إللى هاشيل ..محدش هيفكر يساعد ويرفع معايا الصغيرة التى رمت نفسها على الأرض

نظرات وهمسات..وممكن مصمصة شفايف وبعدين خلاص

اضحك معها ..وواحاول تهدئتها والتحايل عليها ..واستدرار عطفها نحوى, تنجح المحاول كثيرا وتفشل أحيانا وما بين الفشل والنجاح..هناك تقدم ملموس

فيما مضى كانت تسألنى مريم لماذا ينظرون لها.أجيب اليس هذا ما تفعليه عندما يصرخ طفل عادى ويغضب ويرتمى على الارض

قالت نعم..قلت لها الناس أيضا مثلنا , ثم نحن عندنا كنز يفتح لنا حسنات لا تحصى ولا تعد

عندما تضحكى فى وجهها أو تطعميها أو تملسى على شعرها..تقومى بمساعدتها فى اللبس..تعليمها كلمه

تبتسم طفلتى الكبيرة وعيونها مملؤة بالدموع ..تقول لى هل هذا يعطينى حسنات..قلت لها ستتفاجئ يوم القيامه بالخير الذى سيغبطك عليه الآخرون

لا اخفى عليكم قلقى.

نحن نستعد لسفر قريب اذا اراد الله ويسره كام يوم مصيف. نسأل الله أن تتيسر لنا الظروف والأحوال

فانفجرت الرغبات والتصريحات بالبعد عن الناس نختار مكان نائى ..وصلت لحد الالغاء حتى لا نتمرمط ده اللفظ اللى اتقال

قلت اللى مش عايز يتمرمط هو حر ..هى من حقها تتفسح . وكشرت عن انيابى...وبدأت دورات علاجيه ..لا أعلم من أين اتت هذه القوة حتى ابدأ فى تهيئة من حولى لقبول الرحله

أظن من عند الله لان صح منى العزم فهدانى للحيل

والحمد لله المحاولات بدأت تنجح...انا عاوزة ااقول إننا

لازم نقبل نقط ضعفنا ..حتى نستطيع التعامل مع الناس

ونواجه فضولهم

محدش بيسيب حد فى حاله كل الناس بتتريق على بعض ..كل الناس مشغوله بغيرها ... محدش شاغل نفسه بهمه

طبعا فى يوم كنت كده ولا اكذب على الله ..والآن عرفت انى كنت مخطئى من يريد ان يفعل ما يشاء فليفعل ..ولا شأن لى بالناس.

ارجوكم تقبلوا ضعفاؤكم..وتقبلوا نواقصكم...وتعاملوا معها بمنطق الرضا...ستختلف الدنيا

هناك أكثر من شخص قابلته فى حياتى ..لا أعرفهم كانوا جنود من الله فى وقت الضيق يظهروا ويساندوا فى صمت او فى عمل ويرحلوا

لو تتذكروا من اكثر من سنه كتبت اشكوا لكم من الناس... ومرارة التعامل معهم وسلخهم لنا بالنظرات ورفضهم وجودنا بينهم ويعبروا عنه بمراقبتنا وتضييق المكان علينا بالفضول.والآن اكتب لكم انى لا أرى الناس ولا اهتم لنظراتهم واحاول ان افعل نفس الشئ معهم..فقط احاول اسعاد صغيرتى..لانى والله الذى لا إله إلا هو لا شئ عندى أهم منها هى وأختها..ولا ابدلها باصحاء الدنيا إكتشفت ان قبولى التام لابنتى جعلنى لا أرى شئ سوى مصلحتها وسعادتها

فهى الاشارات التى من خلالها أعلم انى احيد عن الطريق أو انى الزمه.

ربى يرزقكم الخير والعافيه وصحة الابدان والقلوب ويبعد عنكم وعن ابناؤكم الشر..ويرزق من عنده قمر مثل ليلى الرضا والصبر

اختكم الفقيرة إلى الله الراضيه بقضاوه الفخوره بإختياره

الداعيه لكم ولها يالرحمه وبلوغ رمضان

ملحوظه صغيورة الصورة هى ما ارجو ان يكون حالنا عليه عندما نتعامل مع مشاكلنا

اعتذر البوست مرتجل وغير مرتب لانى اكتبه بمشاعرى

الآخر .....ما بين الرفض والقبول

2010-07-16T00:23:00.008+03:00

السلام عليكم ورحمة الله وبركاته

اولا اعتذر عن طول المقاله

سؤالى استهل به الموضوع

هل تعرضت لموقف رفض من أحد أو رفضت أنت أحد؟

هل فكرت سبب رفضه لك..او رفضك له؟

هل فكرت انه قد يكون عيب فى شخصيتك أو عيب فى شخصيته هو الذى جعلك وجعله ترفض الآخراجدنى انا من اصحاب الشخصيات المعيبه

اقاومها لاإراديا" وكلما كبرت فى السن اجد الصعوبه تزاد ...ولكن داخلى شئ يرفض رفضى هذا لانى اعلم انه أكيد هناك شئ وراء هذا الاختلاف اراده رب العالمين

وَلَوْ شَاءَ اللَّهُ لَجَعَلَكُمْ أُمَّةً وَاحِدَةً وَلَكِنْ يُضِلُّ مَنْ يَشَاءُ وَيَهْدِي مَنْ يَشَاءُ وَلَتُسْأَلُنَّ عَمَّا كُنْتُمْ تَعْمَلُونَ

النحل آيه 93

هذا.... ولا اتحدث عن الديانه .... العكس تمام كان لى اصدقاء ومعارف من النصارى لا يضايقنى التعامل معهم ...هذا لاننا واضحين انا مسلم وأنت مسيحى وانتهت القصه أو قد يكون السبب فى هذا التفاهم ما حدث لى وانا طفله ذات الست أعوام او اكثر قليل لدرجة ان الصور غير واضحه

كنت طفله صغيرة العب بين الشاليهات فى الاسكندريه ...وكنا نلعب مجموعه من الاطفال...ولا أدرى سبب انى سألت أحدهم انت مسلم ولا مسيحى

معرفش ليه سألت السؤال ده...بس الحقيقيه الطفل اللى كان بيلعب معايا لا اتذكر راوغنى ام قال انه مسلم يختبرنى...وقعت فى الفخ وقلت له مش بحب العب مع المسيحيين...فسألنى ليه قلت له علشان مش عارفه بس علشان مش مسلمين...رغم انى من بيت أمى وأبى كان لهم اصدقاء مسيحيين...لكنى كنت بدات ادرك ان هناك مسلم ومسيحى...لا اعلم لماذا قلت له هذا...ووقتها قال لى أنا مسيحى ورفض يلعب معى هو واصدقاوه المسيحيين

زعلت قوى من نفسى انى قلت حاجه زعلتهم لانى كنت مبسوطه وانا بلعب معاهم...ومن وقتها بطلت اسأل انت مسلم أو مسيحى...واتعامل على اساس الانسان...ولما بدأت اكبر ادركت اننا غير منهون عن التعامل معهم ...ولكن لا نتخذهم اولياء بمعنى انى لا اتقف مع احد من غير دينى على ابن دينى

هى مقدمه فقط لتوضيح ما اقصده بالآخر فليس لدى أى مشكله فى التعامل أو الشراء او الذهاب لأ مسيحى طالما هو افضل من غيره فى تخصصه...ليس لدى مشكله فى هذا

مشكلتى هى الآخر سواء مسلم أو مسيحى ولكن عكس ما اتصرف وما أعتقد وما اقتنع

أريد ان اقول شئ..لا أدرى هل يعيبنى أم يميزنى ...بحيث إنه يصفنى ولا أقصد يميزنى انى اكون ذات شئ يدعو للفخر...فقط للتوضيح وليس للإسترسال الغير مبرر

أنا أعجز عن التعامل مع من يختلف عنى...عندما يتحتم على التعامل مع من هو مختلف عنى ...اشعر بحائط صد عازل يقف بينى وبينها ولكنه من الزجاج....يسمح لى برؤيتها ومتابعتها ويسمح لها برؤيتى ومتابعتى ...وقد يمنحنى ويمنحها فرصى تبادل التحيه...وقد لا نتبادل التحيه.

مثال على هذا

لا استطيع التعامل مع السافرات بشكل مقزز ....اقصد من تكشف اكثر مما تستر...اجدنى غير قادره على التواصل معها ليس لانى افضل منها..ولكن لانى نفسيا لا افهم لماذا هى تفعل هذا...وايضا لا استطيع ان اجد شئ يجمعنى ممكن ان اتحدث معها فيه

يحضرنى ان مرة احد الجيران يقول لى تحدثى مع جارتنا الفلانيه لان الكلاب تزعجنا وأيضا نجسه

وقتها كنت اعتقد مثله ان الكلاب نجس ...وهذا ما علمت انه غير حقيقيى بعد دراسة مختصرة للفقه

المهم رديت عليه وقلت له حضرتك ازاى واحد مش محجبه هاقول لها متربيش كلاب او ان الكلاب بتزعجنا...هى لم تسمع كلام ربنا ...هتسمع كلامى...وسيبته ومشيت

طبعا انا مخطئه كليا فى حكمى انها مش هتسمع كلامى وانها تعصى الله بالتالى لن تستجيب لأى نقاش

...لم ادرك انها قد تكون تعصى الله وهى مكدره ...ولا تجد من يشجعها على الطاعه

ولا علاقه ولا مقارنه بين ما تفعله وبين ان اتحدث معها

هنا ظهرت مشكلتى مع الآخر

ايضا السيدات اللائى تتحدث بفاحش من الكلام على الملأ وبجرأة ..قد اغفر لها ان تتكلم بجراءة فى جلسه نسائيه استطيع ان اقول لها بينى وبينها هذا لا يجوز ولا يصح اما على الملأ وحيث يوجد الرجال فلا والف لاء

لا استطيع ان اتعامل مع بذيئة اللسان ..او السيدة التى طول الوقت تتكلم عن فلانه وعلانه ...وعملوا وسوا وكان وكانوا

يجب ان اتعامل معهن حتى اقدم النصح اذا استطعت...ولكنى اعجز تمام العجز...هو عيب فى شخصيتى

ايضا اصحاب الفكر الليبرالى لا استطيع التعامل معهم بصداقه وحميميه

السلفيين المتشددين لا استطيع التعامل معهم, طول الوقت ينتقدوا طريقتى..او اذا دخلت معهم نقاش لابد ان يصرخوا فى وجههى

الاستثناء فى الواقع....هوالشيخ محمود المصرى.... الشيخ سالم عبد الجليل

يتقبلون الاخرين ولا يعنفونهم اذا ما اختلفوا معهم من أجل ندرة هؤلاء

لا استطيع ان اتعامل إلا مع الذين يشبهونى

من اسباب رفضى الذهاب إلى مارينا أو أى مكان فى مجون شديد.. ان الناس هناك لا اجد أحد منهم يشبهنى...لا اقصد انى الافضل او المميزة..لا...ولكن اقصد من يحب ما احب ويكره ما اكره من ينظر للاشياء مثلى.... لا يشبوهونى..كل شئ فيهم زائد عن الحد اشعر بارتباك وعدم راحه واختناق

زوجى وابنتى يستطيعوا الحياة فى مارينا أو الاماكن التى ارفضها... أظنهم يتقبلون الاخر عكسى تمام

أنا مجرد ان اضع قدمى بها اشعر انى اصاب بنوبات ربو ..طبعا الجو رطب جدا ولكن نوبات الاختناق من ما أراه...او اجده أو اسمعه

مشكلتى الحائط الذى يقف بينى وبين الآخرين

على فكرة انا اتعامل معهم بشكل خارجى طيب ولكن من الداخل اتمنى ان تنتهى وقفتى معهم او ان لا اتحدث او اراه مرة أخرى

ما يؤلمنى انه قد يكون هناك أحد من الآخر الذى أرفضه يكون صاحب فضل على..او يفيدنى..او أتعلم منه

اولا فى نهاية كلامى ارجو منكم ان

تخبرونى كيف انتم مع الآخرين

ثانيا هل ممكن ان اجد طريقه تسمح لى التعايش وقبول الآخرين

ملحوظه قبل الرحيل

فى عالم التدوين وجدت من يتقبل الآخرين

من المدونين الرجال كثيرون ولكن اختص

كل من المهندس عصفور المدينه

والاستاذ ايهاب الطائر الحزين

اعرف من المدونين النساء هن احبتى واخواتى اللاتى اتمنى ان اكون مثلهن

خمسه فضفضه

وجنى الجنيتن دان...أم جنى

وأيضا" بيلا ..افكار مبعثرة

الثلاثه رأيت كيف يتقبلن الآخرين..ولا يتعاملن معك على اساس انك مختلف عنهن

من خلال علاقتى بهن فى الفيس بوك اكتشفت انهن مميزات بشكل ملفت للنظر..لا ينتقدن ولا يعلقن على تصرفك ولا يجرحنك ابدا"

ولكنى احب ان الفت الانتباه لفضفضه

...دكتورة صيدلانيه...منتقبه

وكانت المفاجئه هى انها منتقبه

لاننا لدينا حكم سابق على المنتقبات انهن ينتقدن أى تصرف يختلف عن الغير منتقبه

لم اشعر يوم انها تعمل هذا..,لا تضع نفسها حكم أو قاضى..هى تقبلك كم انت...لا تعلق على أى تصرف ولا تتخذ موقف معادى من الذين يختلفوا معها

تحيه صادقه لاكثر الناس تقبل للآخرين

فضفضه ....بيللا.... أم جنى

احبكن كثيرا علمتونى دون ان تدروا ان بى شئ يحتاج لعلاج

لم تمسكن مشرط ولا قلم فقط من تعاملكم مع الاخرين جعلتونى انتبه لعيبى

احبكن فى الله كثيرا"

بإرادتى ...والآن غصبا" عنى

2010-07-12T01:50:00.006+03:00

السلام عليكم ورحمة الله وبركاته

بجد افتقدت عالم التدوين....رغم انى كنت ساعات اقرأ هنا وهناك....بس اللى حصل هو إنى
قفلت المدونه لما فجأة حسيت انى مش قادره اتواصل مع حد...وكان عندى هدف بسعى اليه(مازلت اعمل على هذا الهدف)بس مش قادره اقرأ او اسمع اخبار جديده .....،كلها محبطه
طبيبعتى متفائله بس لما كل شئ يبقى محبط يبقى الأفضل نبعد ونقعد مع نفسنا شويه
علشان شوية التفاؤل الموجودين ميروحوش ونبقى زى أى حد محبط متشائم ...مكتئب...سوداوى النظره
كلنا عندنا اللى ينكد علينا عيشيتنا ويحبطنا.... ويخنقنا من رموش عنينا كمان،فى البيت فى الاهل فى الجيران فى الشغل حتى فى الشارع.
مش بس كلام الجرايد المحبط .....ولا التلفزيون .....ولا اخبار الناس اللى حوالينا
تسمع فلان طلق فلانه ...وفلانه اتطلقت من فلان.... واتخانقوا...ومحاضر فى الاقسام
وعلان مات...وغيرهم عيان ...وقبلهم مين ظلم مين
ومين سرق مين ومين اكل حق مين ....ومين ومين ....ومين!!!!!!
مش عارفه ليه سلوكيات الناس كلها اتغيرت......حتى الناس اللى كانت هاديه والبصه فى وشهم تهدى اعصابنا سنه...دلوقت اصبحوا كتل ناريه متحركه... رؤيتهم تشعل النار فى صدرونا اعوام ...لا إله إلا الله.

مش عارفه العيب فين.؟..هل هو فى الاكل والشرب والهواء اللى بقى فاسد...؟؟
ولا السبب اننا بعدنا عن الاصول والاخلاق ...وبقينا نستسهل كل شئ؟؟؟ فاصبح الحرام شكله شبه الحلال...مش بيفرق فى طعم ولا ريحه؟
اشوف ناس عماله تاكل مال حرام...هو طعمه حلو قوى كده...هو مش بيخلى الناس تشبع؟
هى السلوكيات المشينه...ظريفه قوى محدش بيحس منها بالخجل ولا الاحراج
هى الناس مبقاش عندها دم؟ ...ولا مبقاش عندها اخلاق
ولا الاصح مبقاش عندها دين؟؟؟؟؟؟
هو الدين .
أنا رأيى انهم نجحوا فى تدمير الجزء الخاص بالدين فى نفوس الناس علشان كده
بقى الدكتور مفترى...والمهندس غشاش ..والمحامى مدلس...والظابط مفترى وقاتل..والمحاسب بيغش
والخباز غشاش وسارق.... حتى الزبال اللى كان مخلص بقى ينقى الزباله اللى تعجبه والباقى يرميه
هو انا مش عارفه اخرتها ايه
انا مش جايه ااقول كلام متكرر انا بس بفند ليه بعدت وليه بحاول ارجع يمكن ااقول كلمه حد يستفيد منها يبقى يوم القيامه قدام ربى عملت حاجه
صحيح محتاجه ابدأ بنفسى وببيتى....بس والله فعلا بحاول ..وان شاء الله انجح...وانتم تنجحوا
بس المهم نبدأ ازاى مع انفسنا والغير...نصايح ولا ارشادات ولا نبدأ باننا نعمل ونتصرف؟
يعنى النصايح بقت بايخه...طيب مهو انا بعمل...بس غيرى مش واخد باله ..كل واحد مشغول باللى هو فيه

بصوا بقى معلهش ...طيب خلاص انا هاقفل على كده اصلى بجد مش حاسه انى عارفه اتكلم
حاسه زى ما بدأت اتكلم واكتب بتدفق و بارتجال....برضه الكلام وقف ومش قادره اقول حاجه
بس بجد انتم وحشتونى وعلشان كده فتحت المدونه غصبا" عنى...وسعيده انى اضطريت ارجع

اسأل الله لى ولكم الرضا بالقضاء...اسأله لى ولكم ولجميع المسلمين بالسكينه والراحه
سمحونى على تقصيرى....

يا مفرج الكروب

2010-06-11T23:48:00.002+03:00

بعد صورة الشاب اللى شنق نفسه
والشاب اللى اتسحل
وبعد حاجات كتيير بنقرأ عنها وبتوجعنا ولا نملك شئ
فقلت يارب
انا هادعى وانت استجب ... كما قلت
ادعونى استجب لكم

فرج كربها وكربنا
فرج كربها وكربنا
فرج كربها وكربنا

اللهم إنا نسألك ان تهلك الظالمين بالظالمين
اللهم إنا نسألك ان تجازى كل انسان باللى يستحقه
اللهم انا لا نملك شئ ..زفتولنا وتولى امرنا
وانصرنا على القوم الظالمين
اللهم إنا فقدنا كل شئ ..فلا تفقدنا استجابتك لدعؤنا
يارب بيننا اطفال..وشيوخ ونساء ورجال وشباب وفتيات
يخافونك
ولكن انت القوى...,هم الضعفاء
انت القوى......وهم الضعفاء
انت القوى .....وهم الضعفاء

اللهم اجبر ضعفنا وكسرنا وراحمنا
ولا تملك منا من لا يتقيك ويخافك ويرحمنا

يارب تعجبكم

2010-06-04T23:23:00.007+03:00

فيديوهات فعلا مفيده
يارب تعجبكم
دعواتكم

فن التغليف اليابانى

تطبيق التي شيرتات

تطبيق الشرابات ( الجوارب)

ربط الحذاء

احب اطمنكم ان الحمد لله ليلى بتتحسن دعواتكم

اسألكم الدعاء

2010-05-28T12:51:00.001+03:00

السلام عليكم ورحمة الله وبركاته

كثيرون منكم يعرفوا أن ليلى ابنتى الصغيرة من ذوى الاحتياجات الخاصه
ويشاء الله العلى القدير ان يرزقنى ابتلاء آخر فى ابتلائى وان تصاب ليلى بالتهاب العصب السابع فى الوجه وهو ما يؤدى إلى شلل فى نصف الوجه مؤقت
يحتاج إلى علاج بالادويه وهذا الجزء يسير ولكن الجزء الخاص بالعلاج الطبيعى هى ترفض الذهاب إلى المراكز الخاصه بالعلاج الطبيعى
لذا اسألك الدعاء لى بالتيسير وان يهدى لى ربى الاحوال وييسر لنا الحيله لنجعلها ترضى او نجد من يأتى إلى البيت حتى تأخذ علاجها

لا تنسونى من دعاؤكم
دعوة بظهر الغيب ان شاء الله يستجيب لكم ربى

امى

2010-05-21T19:16:00.002+03:00

هنا اضع ما أكتبه هناك. فى بعض معنى مدونتى الأخرى
لان ما أريد أن اكتبه هنا يحتاج عقلى...وعقلى مشغول بالكثير ولا أريد أن اكتب ما لا يستحق
وأحتاج أن اقرأ كما قالت كلمات من نور

ولكن ما اكتبه هناك أكتبه بقلبى ..وقلبى يكتب هناك عن جزء مات منه بفقدى لها

(لن يشعر ما اقول إلا ما ماتت له هى.... ربى يحفظ كل الامهات والآباء
أجمل حقيقه فى حياتنا وكثير منا لا يشعر بها ...بل قد تجد من يتافف من الإهتمام الذى تواليه إياه امه
اقول لمن تعيش أمه لا تحرم نفسك من نعمه يشتاق لها الكثيرون
والله إنى لأتمنى ان تعود وأترك الدنيا كلها فقط لأكون تحت قدمها
ولكن للأسف لن يحدث ما اتمنى
لذا
يا من تملك الفرصه لا تضيعها)

ولن يعلم ويقدر هذا ألا ما رحات عنه الحبيبه وفقد جزء من قلبه برحيلها...وُسرقت من حياته البركه والسعاده

إلى اجمل وارق وأطيب هى فى حياتى....ولم اشعر بقيمتها إلا بعد ما اصبحت

هــــــــــــــــــــــــــــــــى
الثلاث أجزاء...ولا أدرى هل هناك مزيد..قد يكون

ولكنى

أكتب حينما تتجلى لى حقيقه من حقائق علاقتى بها

لا تضيع وقتك مع صديق أو مع زوجه لا تحب لك الخير... وتطلب منك ما يبعدك عن أمك وابوك
..لا تضيعى وقتك مع صديقه او أى وقت قد يسمح لك زوجك به وبدل من ان تبرى أمك تضيعى وقتك في اى شئ بلا قيمه
يا من تملك الفرصه لا تضيعها...فلن يكون هناك من هو مثل الأم

هــــــــــــــــــــــــــــــــــــــــــــــــــى

2010-05-10T06:26:00.003+03:00

هـــــــــــــــــــــــــــــى
بوح فى مدونتى الأخرى