الجمعة، يوليو 30، 2010

زعلان....؟؟؟؟ إتفلق !!!!!!!!!!




السلام عليكم ورحمة الله وبركاته

العلاقات الانساينه شغلانى جدا" مش عارفه ده سببه ايه

حساسيه..ولا فراغ يعنى..ولا ناس غاويه وجع قلب؟

معلهش استحملونى ...رمضان قرب وهترتاحوا منى ومن اسئلتى

عاوزة أعرف لو انت زعلان من حد هتقوله أنا زعلان منك...ولا هتسكت لغاية ما تروق من ناحيته... وتحس انك قادر تتعامل معاه بكل مشاعرك

طيب وبعد ما تروق بتكون روقت فعلا؟...ولا من فوق الوش

فى ناس متقدرش تتعامل مع أى حد وقلبها زعلان,

وفى ناس بتتعامل مع الكل وقلبها زعلان,

وفى غيرهم بيتعاملوا فقط مع اللى ميهمهمش واللى يهموهم لازم يعاتبوهم.

هل تعرف أهميه العتاب

فى ناس تقل العتاب نقصان عقل.

وفى ناس تقول العتاب محبه.

وفى ناس تقول العتاب يجر المشاكل.

فى ناس تحب لما يكون حد زعلان منها يصارحها,

وفى ناس لو حد صارحها تهاجمهم وتقلب الموضوع عليه.

يعنى لو جيت قلت له مراتك زعلت مراتى يرد عليك ويقولك مهى مراتك كمان قرفت مراتى...يعنى مش هيسألك ايه الموضوع

لو قلت له عيالك بيعملوا كذا هيقول لك عيالك بيعملوا ويسوى ويبهدلوا الدنيا

طيب يعنى تسكت...ولا تصارح.؟

ولا هى معتمده على دماغ اللى بتتكلم معاه ونفسيته.؟

ساعات مقولش لحد على حاجه زعلتنى..وابقى واخده جنب شويه نوع من التعافى من الموقف.... لانه ممكن يعدى لو الواحد بعد شويه..مش طالبه عكننه.

افاجئ ان الشخص اللى زعلانه منه زعلان منى انى مصرحتش بزعلى ...ااقوله فى ناس يتزعل منى لما اصارحها باللى مضايقنى.

سبحان الله البشر انواع واصناف والتعامل معاهم عاوز حكمه وكياسه انا عن نفسى افتقدها..قبل كده قلت معرفش اتعامل غير مع اللى شبهى.

حتى فى المصارحه احب لما ابقى زعلانه من حد أروح أأقوله

وأحب اللى يزعل منى يقولى.

مش بحب التفويت اللى من فوق الوش وفى الداخل بركان يثور فى أى هيافه وخلاص

يمكن مفروض ان الواحد يكون على طبيعته بس عاده مش كل الناس تحب تتعامل بطبيعتها

دايما فى ناس تحب انها تبقى مرسومه,بيقولوا إنه حدود فى التعامل.

بس انا شايفها نوع من التعالى..والتكبر..يمكن كمان نوع من العجز ...مش عارف يتعامل مع الناس.

فى ناس لما تحب حد مترضاش تقولها... وناس تحب تقول,

انا بحب ااقول لما أحب حد..لكن فى ناس مش بتعرف وياريت بتسكت لالآ بتصدك كمان.

الموضوع مش مشاعر رومانسيه ...لاء مشاعر انسانيه ..اخوات ...اصدقاء جيران

يعنى فى ناس تعرف تعبر..وناس لاء

كمان فى ناس تعرف تحتويك وناس تصدك.

مثلا لما حد يقولك أنا زعلان منك...تلاقى الرد إيه

بسم الله الرحمن الرحيم الإجابه

1 – إزعل

2- إتفلق

3هاعملك إيه يعنى؟!

وفى ناس لما تقول لها زعلان منك ..يقول اصالحك...مالك بس؟

هى الحكاية تتلخص فى إن الكلمة الطيبه صدقه...ولا إن دى اخلاق..واساليب ناس,ولا إيه؟

طيب انت مع ان الزعلان يصارح..ولا يستنى..ولا يطنش؟

ولو حاول يتكلم واللى قدامه كبسه ولا صده؟

طيب لو اللى قدامك زعلان منك وحاولت إنت تصالحه وتعرف فى ايه وهو مرضيش...يعنى حاولت كتيير وهو رفض,تعمل إيه؟

هو انا منتظره تفاعلكم ورأيكم علشان كل اللى سبق بيحصل...

أنا حاسه فى حاجه غلط

ملحوظه مهمه جدا"

الشيخ ياسين رشدى توفاه الله يوم الاربعاء 28 /7

رحمك الله يا شيخى الفاضل يا من علمتنى الكثير بقليل من الكلام

‏هناك 21 تعليقًا:

MR.PRESIDENT يقول...

بعد السلام والتحية
أما بعد
من رئيس الجمهورية

المشكلة ان الناس معدش بتتعامل بالفطرة

الواحد لما يكون زعلان بيقول للشخص اللي قدامه لو فيه عشم بينهم .. ولو فيه نص نص يصبر شوية لحد ما يقوله لو مفيش مش بقول لأن ممكن تدمر علاقتي بالطرف الأخر وربما أكون بطبيعتي في احتياج له .

اما لو حد زعلان فالواحد لو فيه دماغ بحب اسمع مشكلته واشاركه لكن لو مفيش دماغي رد هيكون غلس عليه وربما الشخص اللي قادمي لو مش بيفهم هيتأمص ويمشي .
لكن المفروض إن الواحد بيستحمل الكل وبالتأكيد ان الطرف الآخر هيبادل نفس الشعور .

ستيتة حسب الله الحمش يقول...

الحساسين وانا معاهم بنشجع لوم الأحبة فقط
القريب للقلب صعب حد يعامله من على الوش
أما المعرفة فده ممكن أءقلم نفسي إني اتعامل في حدود وبلا أي عتاب

تحياتي وكل عام وانتي وبنوتاتك واهل بيتك كلكم كلكم طيبين

أنا حرة يقول...

أختى أم البنات
السلام عليكم ورحمة الله وبركاته...
على فكرة أنا كمان أم البنات.. عندى ثلاثة.. ربنا يبارك فيهم وفى كل أولاد المسلمين يارب.. ديه أول مشاركة منى .. الموضوع ده من الموضوعات الى بتحيرنى كتير .. زى ماقلت التعامل مع الناس محتاج كياسة كل واحد حسب شخصيته ومع التعامل بتعرفى كل واحد أيه الأسلوب الى يناسبه.. بعد تجارب كتيره بدأت أبطل أتعامل مع الناس وبدأت أتعامل مع ربنا وارتحت شويه بس للأمانة ساعات مش بقدر أنفذ الموضوع ده لما بأكون مجروحة قوى .. أسيب نفسى شويه لما أروق وأقدر على الجدل ووجع الدماغ لحد ما أوصل لحل مع الشخص الى معاه خلاف.. ثم نبدأ الدوران فى الحلقة المفرغة من جديد .. ربنا يلهمنا الصبر .. هى درجات محتاجة صبر وتفانى لحد ماتقدرى تكظمى غيظك ثم تقدرى تعفى وتصفحى وبعدين تبقى من المحسنين .. ربنا يجعلنا منهم يارب

موناليزا يقول...

اممم
بسم الله الرحمن الرحيم
الاجابة
حسب شخصية الفرد ودرجة قرابته

يعنى مثلا انا عن نفسى بحب اوى اللى يكون زعلان منى انه ييجى يقولى لانى ممكن اكون زعلته وانا بجد مش قصدى لان مابحبش حد يكون زعلان منى حتى لو علاقتى بيه سطحية
وفى الاخر لازم اصالحه وترجع المياه لمجاريها

انا مبعرفش اتعامل مع حد وانا زعلانة منه.. بيبان عليا على طول
لو هو سأل اكيد هقول
لكن لو ماخدش باله او مش فارق معاه مش هقول ومع مرور الوقت هنسى وجوده فى حياتى

كلمات من نور يقول...

ازيك يا أحلى أم بنات ....انتي عارفاني مش باعرف ازعل من حد ومش باحب أزعل حد ولو زعلت حد باعتذر بسرعه و اعترف بخطأي ولو حد زعلان مني بابقى مش عارفه اعمل ايه لغاية ما اصالحه ويصالحني ...بس الناس اتغيرت يا حبيبه ومش بتتعامل بالله ومع الله مع الأسف الشديد ....ربي يهدينا أجمعين

أخدتي بالك إني كتبت في البوست الجديد عنوان درس للشيخ إبراهيم الدويش اسمه تعال نتعاتب؟؟؟ سبحان الله تفكيرنا متوازي (:


انتي تعرفي الشيخ ياسين رشدي الله يرحمه؟؟ اول مرة اعرف والا انا زهايمر واحنا اتكلمنا عنه قبل كده؟ أصل مسجد المواساة كان أول المساجد اللي سمعت فيها دروس للشيخ ياسين والشيخ طلبة ابن اخيه اول ما اتحجبت في الجامعة

مجداوية يقول...



السلام عليكم
والله يا ست عبير حصلي كل المواقف اللي ذكرتيها بمعنى إن كل موقف على حسب أهمية الشخص عندك وأهميتك عنده وعلى حسب تقبله للكلام وعلى حسب دينه وطاعته لربنا لأني على يقين إننا كلما أطعنا الله كنا أكثر رحمة مع الآخرين وأكثر تواضعا لله وأكثر تسامحا
ومن تأخذه العزة بالإثم ويرفض المصالحة فهو الخاسر ولا تأسي عليه ولا تعاودي مصالحته بعد محاولتك أكثر من مرة فأنت برأت نفسك أمام الله وكفى
وهذا ما أفعله حتى ولو لم أكن مخطئة فأنا أبدأ بالمصالحة في أغلب الأحيان لأني لا أحب الخصام ولكن أيضا لا أحب الكبر ومن يتكبر على ويرفض مصالحتي فهو الخاسر وطظظظظظظظظ فيه
وعذرا لهذه الطظ فأنا أمقت المتكبرين

***********
رحمة الله على شيخك الفاضل ونسأل الله له المغفرة والجنة برحمته وفضله سبحانه وتعالى

ELMOSTAFZ يقول...

و الله انا شايفها حاجة بتختلف من شخص لآخر حسب اللي انا بتعامل معاه ، لإني لا يمكن هزعل من حد لسة علاقتي بيه سطحية ، غالبا الزعل بيكون بين المقربين من بعضهم ، و بما انهم مقربين يعني اكيد فاهمين طبيعة بعض و بالتالي كل واحد فيهم مش هايغلب في انه يعرف ازاي يعاتب شريكه او يبين له انه زعلان منه ، الموضوع كله ميكانيكية بين النفوس البشرية صعب نلاحظها لإننا بنمارسها بانهماك شديد فيها...
تحياتي ام البنات...

Sonnet يقول...

رحمه الله

هكذا علمتني الحياة في ظل العقيده يقول...

السلام عليكم ورحمة الله وبركاته
البقاء لله
اسال الله عز وجل ان يرحم الشيخ وكل امواتنا واموات المسلمين كافة
.......................

عاوزة أعرف لو انت زعلان من حد هتقوله أنا زعلان منك...ولا هتسكت لغاية ما تروق من ناحيته؟
لو كان الشخص ده قريب مني اصارحه علطول ده اذا كان انسان بيقدر وبيحس.
..................
معاملة الناس بتكون صعبه جدا على الاشخاص اللي عندهم حساسيه زياده عن اللزوم وانا شخصيا كنت كده وتعبت وارهقت نفسي لدرجه كبيره جدا
حتى اني كان بيجيلي اضطرابات في القلب من كتر الحزن والالم من مواقف وتعاملات
ده غير القولون وغيره
لكن الحمد لله مؤخرا اتحسنت شويه لما ادركت انا بعيش في اي مجتمع والناس اللي بعاملها عقليتها ايه
............
الفيصل في معاملة الناس حالتهم النفسيه وعاداتهم وتقاليدهم
يعني اسهل الناس في التعامل الناس المتزنه نفسيه لانه بيغلب العقل على القلب
اما المصابين بمشاكل نفسيه ودول الغالبيه وانا منهم بيكون التعامل معاهم مختلف من شخص لشخص
لكن الافضل دايما مع النوعيه دي قلة الاحتكاك معاهم لحد ما نعرف طبيعتهم بالضبط قبل ما ناذيهم بتصرفات هي طبيعيه لكن بالنسبه ليهم غير طبيعيه
.......................
خلاصة الكلام يا أمي
لا تأسي ولا تحزني كثيرا وخاصة من معاملة الناس
القله القله من تأبه بمشاعر غيرها

dodda يقول...

هههه
اقولك انا بقى تعملى ايه
انا بسامح اى حد مهماعمل
والاجر على الله
بس تسامحى من قلبك عشان ما يتمليش غل
وربنا يعافينا كلنا بتفمل حاجات تضايق القريبين مننا وبتعدى
لما احنا كمان نعدى
مالا ايه؟
كل سنه وانت بالف خير وربنا ينعم عليكى برضاه
امين

عابرة السبيل = ام بقلظ باشا يقول...

السلام عليكم

وحشتينى فعلا
وعدتك بالتواجد دايما بس برضه انشغلت
===============================
اما زعلان اتفلق :
والله بيعتمد على حالتى النفسيه وظروف الزعل و الشخص اللى زعلان

ساعات بقول اتفلق فعلا لما يكون اشخص اللى زعلان مش من حقه يزعل او مايهمنيش خالص زعله او انا كنت اقصد انى ازعله او انا فيا اللى مكفينى ومش مستعده اصالح حد .

ولكن فى معظم الوقت طبعا بصالح اللى بيزعل منى على طول وخصوصا لو حد غالى عليا

تمام كده ولا ايه ؟

الفقيرة إلى الله أم البنات يقول...

معلهش سامحونى كنت مسافرة ولسه راجعه ان شاء الله هارد على كل التعليقات

maxbeta3zaman يقول...

انا الفقير لله ابو الرجال فعندى 2 رجال ولم اسعد بالبنات ..أما بالنسبة للزعل فعندى حل جديد خالص ...أنا زعلت من الشغل ولقيت الحكايه عيلت قوى رحت مسافر أسبوعين لآخر الدنيا ...كندا ...رحت وزوجتى رحله هناك ونزلنا عند أصدقائنا المهاجرين ...وعدنا أكثر ابتساما وأقل تكشيرا وحنقا ..شاهدنا دنيا تانيه ففكت العكوسات ونسينا الفلقه وهرى الدماغ والكآبه ...نصيحتى عند توفر الإمكانيه_
سافر ففى الأسفار خمس فوائد
تفريج هم واكتساب معيشة
وعلم وآداب وصحبة ماجد

momken يقول...

بصى ياستى

بيقولوا العتاب على اد الغلاوة

لو حد انا عاوز احافظ عليه واخليه مستمر فحياتى...هاروح اقوله انا زعلان منك وازعق له واقول متعملش كده تانى يا حمار..يا جزمه علشان انا بموت فيك وبزعل من نفسى لما بزعل منك

لكن لو شخص الخلاص منه جايزة يبقى ما هصدق يغلط فيا ..وعليها مش هيشوف وشى تانى وهحرمه من وجودى فحياته وده اكبر عقاب ليه واكبر راحه لشخصى البسيط


تحياتى

فشكووول يقول...

السلام عليكم ام البنات هانم
تحياتى
ما علهش اصلى صايم ويا دوب فاضل ربع ساعه على الفطار ومش قادر اقرأ حاجه .. بس انا جاى هنا اصلا عشان ابارك لحضرتك برمضان
كل عام وانت بخير
كل عام وانت الى الله طائعه
وفى قلبك ذاكره
رمضان كريم

شمس النهار يقول...

ازيك يارب تكوني بخير

كل سنه وانتي طيبه وبخير وسعادة

مش عارفه اكتب ده في اي مدونة من مدوناتك

تمنياتي لك برمضان سعيد

:))

الطائر الحزين يقول...

كل عام أنت بخير

=====

على قدر رصيدك عند الناس يتحمولك

شمس النهار يقول...

جايه اطمن عليكي
واقول لك وحشتيني
وكل سنه وانتي طيبه
تحياتي

أ / أحمد عبد المنعم يقول...

كل عام وأنتم بخير
هدية العيد على http://ommee.blogspot.com/

غير معرف يقول...

ثقافة الهزيمة.. أسكندرية ...ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى www.ouregypt.us

sites like service يقول...

شكراااااا لك .....مقالتك اكثر من رائعه