أنا مش زعلانه....وبرضو زعلانه

السلام عليكم ورحمة الله وبركاته

بعد سنتين من انقطاع عن التدوين المنتظم بسبب الانشغال بالثورة ...والاحداث

اكتشفت اننا كنا قبل الثورة ناس تانيه خالص

انا مش زعلانه انك مختلف معى سياسيا

مش زعلانه انك مختلف معايا فى طريقة التفكير

مش زعلانه انى شايفه نفسى بتكلم صينى وانت بتتكلم هندى

مش زعلانه انى بيتهيألى انا صح وانت غلط..وبيتهيألك انك صح وانى غلط
مش زعلانه ابدا ابدا اننا بنتناقش ونطلع من النقاش  كاننا مدخلنهوش

مش زعلانه انك ممكن تكون فعلا الصح واكون انا فعلا المخطئه

بس انا زعلانه لانحدار مستوى الحوار

زعلانه لكم الكره ..كم الغل ...كم الحقد

زعلانه اننا بنخاصم بعض علشان  مش عايزين نتقبل اننا مش زى بعض

زعلانه من ناس كنت فاكراهم محترمين ..ولكن عنى مختلفين ..بس لقيتهم بيقولوا الفاظ لا تقال بين البلطجيه

الفاظ لا تصح مع نساء او حتى من رجال  محترمين

اكتشفت اننا شعب بيحب قلة الادب ..ويمارسها فى اللفظ والتصرف

وشعب بيحب التدين والاخلاق فقط للمشاهده والمتابعه ..بس لا يقبل ممارستها ويرى نفسه حلوة وزى الفل 

احنا محتاجين الاول نشتغل على نفسنا وبعدين نبقى نفكر ان بلدنا تتحسن...

للاسف اكتشف اننا انانيين اينما تكون مصلحتنا يبقى هو ده الحق والخير والصح

بس ظنى فى الله هو اللى مصبرنى...وظنى فى الله خير

                                     

عودة.....يارب تدوم

عودة الى عالم التدوين بعد ما اصبح التواجد فى عالم التواصل الاجتماعى كئيب واتصدمت فى ناس كتير

للاسف انا مصابه بالفشل فى الحكم على الناس

ان شاء الله اتواجد مرة اخرى

ابنتى

23 يونيو من 11 سنه نورت الجميله الصغيرة ليلى .....غيرت حياتى تماما

لن استطيع ان اقول ان التغير جعل حياتى سهل ..لا بالعكس اصبحت اصعب بكثير..وفيها من المراره ما لم اتخيله فى حياتى

ولكن يكفينى ضحكة رضا واحده منها تجعلنى انسى ما تصنعه بى طوال اليوم

هى جميله وعنيده ولكنها طفله محرومه من ان تستمتع بحياتها مثل باقى الاطفال..قدر الله وما شاء وماقدره خيرلها ولنا

دائما احلم انها ستصبح شابه جميله معافاه من كل مرض

وكل يوم نلتقى بتاجر من خريجى الطب ليعبث بقلوبنا..ونتمسك باليقين فى الله ..ونخرج من هذا الموضع بنفس محبطه وفلوس مسروقه

ومشاعر منهك...ولكن نحمد الله انها فى النهايه لم تتغير ولم يحدث ما يضرها  اكثر من وضعها

نحمد الله على لطفه بينا..ونرضى ..وكلما نرضى يكرمنا

مشكلتى هى ..اننى استهلكت..وهى تكبر وتقوى ..وأنا أكبر واضعف

اسأل الله ان يزيدها قوة وصحه..وان يرزقنى الثبات والقدره ..وان يبارك فيها وفى اختها الكبيرة  الجميله

اسألكم الدعاء لها ولجميع اولادنا ...وان يرزق اطباء العرب التقوى..والخوف من الله

آخر يوم فى ابريل

اغيب ...مشارى العفاسى

يارب الطف بنا وبكل مكروب

والطف بمصر ....والطف بسوريا

يارب نسألك الفرج القريب

الجمعه 30 مارس

كل ما اشعر به واعانى منه لا استطيع  أن أسطره..خوفا ان يكون اعتراض او شكوى من قضاء الله

كل ما اسألكم عليه هو الدعاء لى بالرضاء اكثر بقضاء الله...وان تسألوا الله لى تفريج الكروب...وان يرزقنى الصبر الجميل 

ولكم دعاء بالمثل من من هم افضل منى ملائكة الرحمن

لماذا...ليه.؟

(هذه الصورة ما فعله الخنزير الأب..وما اشبه اليوم بالبارحه)
اسأل نفسى مرة بالفصحى ..ومرة بالعاميه  لماذا..ليه

فقدت القدرة على الكتابه ..منذ وقت كان بسبب الفايس بوك والانشغال بالاصدقاء...الآن حال مصر يغم..وحال البلاد العربيه ايضا  الحقيقيه 

دى المرة الكام مش عارفه احدد.. افتح صفحة ارسال رساله علشان اكتب مقدرش....مكسوفه من نفسى وانا عايشه فى امان واخواتى واولادى وبناتى واهلى فى سوريا يعيشون اصعب الاوقات .... طبعا أمان ...رغم ان هناك من سيقول لى  والبلطجيه والبلاوى المتسلطه علينا 

هاقوله البلاوى المتسلطه شئ وانك فى بيتك واولادك فى حضنك تلاقى قذيفه خطفتهم من حضنك او قتلتكم جميعا وانتم مش عارفين ليه اتقتلتم...وليه بيعمل فيكم كده الحقير الذى تأبى الحيوانات او الاشياء ان ينتمى اليها ..عار البشر  الخنزير ابن الخنزير بشار

واكثر ما يقتلنى هو وقوف بعض الدول معه...ولكن الاصعب صمت العرب  ولكن لماذا غريب هؤلاء هم نفسهم الانظمه القذرة التى طالما صمتت على ما يحدث فى فلسطين الحبيبه ...عندما يتغير هؤلاء ويأتى لنا حكام رجال يخافون الله ولا يخافون امريكا وقتها سيكون الموقف مختلف

يارب انا خجلانه منك واعلم انك ستؤاخذنى على تقاعسى ولكن يارب انت تعلم انى لا املك إلا الدعاء واذا كان هناك من يستطيع ارسال شئ لسوريا ان شاء الله نرسل غير هذا ..مقصرون وعاجزون ومكبلون 

يارب ارزقنا القوة والدعم من عندك يارب
انصرنا وثبتنا لنرى باعيننا تحرير الاقصى يارب يارب 

2011...2012....2013

 رحم الله شهداؤنا

مثل هذا اليوم العام الماضى ...كنا فى حالة قلق ورعب وتخبط ولم نعرف  مصير الثوار...والثورة
ومازلنا 
ولكن 

 مثل هذا اليوم  من العام القادم نتمنى ان نكون توصلنا لمصير ثورتنا.

وإن شاء الله 

سيرحل العسكر..ويقتلع نظام مبارك من جذوره...وتعود مصر لمن يحبها ولا يحب نفسه

يارب قر أعيوننا بنصر مصر

ليه تقتلنى ؟علشان بقول يسقط يسقط حكم العسكر؟

 تحديث

أم محمد مصطفى
شهيد الهندسه ونتخب التنس( البلطجى من وجة نظر العسكر)
من كتر الالم والوجع مش عارفه اكتب شئ عن اللى بيحصل
نفسى اكتب بس مش عارفه اكتب ولا كلمه...مش مصدقه اللى بيتعمل فى شبابنا...مش مصدقه قتلهم بدم بارد كده
مش مصدقه بيقولوا القاده لهم ايه علشان كده بينزلوا يقتلوا اخواتهم
سؤال لأى ضابط وأى جندى....الاوامر دى مقدسه؟ صح
طيب أوامر ربنا...عمرك ما ضيعت فرض؟ عمرك ما ارتكبت اثم. طول عمرك بتنفذ اوامر ربنا؟
ياراجل لما ممكن يضيع فرض ومتنفذش اوامر رب العباد....ينفع ولله المثل الاعلى انك تطبق اوامر ظالمه؟.
متعرفش تضرب فى الهوا..متعرفش تضرب فى الارض مضطر هيقتلوك يعنى....يا ناس تطبيق الاوامر مش قرآن
القائد بتاعك ظالم تبقى ظالم زيه؟ ايه الفرق بينك وبين المجند الأمى الل مش فاهم حاجه
والله مقدرش ااقول غير ان اللى نفذ الاوامر مش مضطر ..ولكن حابب يعمل كده لانك مش فى الميدان..واللى قدامك مش العدو.
قتلت اخوك..يتمت  اولاده؟وجعلت نساء ارامل وامهات ثكلى...بتعرف تنام عادى  مرتاح عادى
هتقول ايه لربنا؟. هتعتذر بإيه
مكنش عدوك ..كان اخوك فى الوطن ..ركبتوا يوم مواصلات سوا..وقفتوا يوم قدام محل تتفرجوا على الجذم...لعبتوا سوا وانتم صغيرين فى حديقةالحيوان...كنتم بتقولوا عليها جنينه الحوانننات صح؟ معقول بتنزل تضرب اخوك بالشكل العدونى ده فقط لانه قال يسقط يسقط حكم العسكر؟
طيب مهو كلنا بنقول يسقط يسقط حكم العسكر...هو مبارك مش كان عسكر؟
مهو كلنا عايزينها مدنيه...مختلف معايا...شايف انى غلطان...تقتلنى ياخويا تقتلنى ..ولا تفهمنى او تعاقبنى ..تسلب منى روحى وتحرمنى احقق أحلامى؟ ليه يا اخويا وانا نازل عايز بلدى أحسن
كل ده علشان كنت بقول يسقط يسقط حكم العسكر؟ مهو يسقط يسقط حكم العسكر
ليه يتمت ابنى ليه خليت مراتى الحامل ارمله...ليه حرقت قلب امى..ليه كسرت ابويا
علشان بس بقول يسقط يسقط حكم العسكر

طيب انا مت..وابنى اتيتم...وامى اتقهرت...وابويا انكسر ...وهيسقط يسقط حكم العسكر

أعمل إيه

الصورة دى وصتنى بس الحمد لله مفهمتش حاجه
طبيعى إنى ان شاء الله هاروح الانتخابات وانتخب...بس إللى مش طبيعى إنى مش عارفه اعمل إيه
يعنى هل يوجود ارشادات  ازاى نتصرف دون ان نبطل الصوت؟

يعنى ايه قوايم..يعنى ايه فردى..يعنى إيه مستقل

قبل كده كنت بروح اعمل فئات وعمال وخلصين

دلوقت مش عارفه اعمل ايه ..اه محدده هانتخب من حزب إيه..ولو مستقل هانتخب مين

بس السؤال انتخب من حزب ومستقلين ولا لازم من تقسيم واحد

بجد محتاسه ومش عارفه اعمل ايه

دلونى ودلوا غيرى بالله عليكم محتاسين

كل سنه وانتم طيبين

كل سنه أنتم وكل أحبتكم بخير